(16.12.2009 RV)Acarohet sërish tensioni ndërmjet Iranit dhe Perëndimit, pas
provës me raketa të paradites së sotme, organizuar nga Teherani. Fjala është për raketa
me hedhje të gjatë, të cilat mund të arrijnë deri në Izrael e mund të godasin bazat
ushtarake amerikane në Gjirin Persik e përtej. Dënim i menjëhershëm nga bashkësia
ndërkombëtare, ndërsa Uashingtoni miratoi sanksione kundër kompanive të huaja që furnizojnë
me benzinë Iranin. Gjithnjë e më e nderë edhe gjendja brenda vendit të ajatollahëve.
Kreu i magjistraturës iraniane ka deklaruar se ekzistojnë prova që liderët e opozitës
kanë organizuar protestat kundër zgjedhjeve presidenciale të 12 qershorit. Ai paralajmëroi
se sistemi gjyqësor mund të reagojë kundër tyre.