Gëzimi i vërtetë i krishterë në fjalët e Papës, i cili gjatë Engjëllit të Tënzot bekon
shtatoret e Krishtit Fëmijë e kujton 4 misionarë vrarë në Afrikë.
(14.12.2009 RV)“Krishtlindja do
të kremtohet përsëri, për të na kujtuar se Misteri i Zotit është burimi i gëzimit
të vërtetë. E Zoti vjen pranë nesh, kur e jetojmë atë që përfaqëson Shpella e Betlehemit:
dashurinë, përvujtërinë, varfërinë. Kjo frymë festive përshkoi lutjen e djeshme të
Engjëllit të Tënzot. Takimi i Papës me besimtarët në Sheshin e Shën Pjetrit tingëlloi
si ftesë për ta pritur Krishtin me dashuri në të gjitha shtëpitë e Romës e të botës.
Benedikti XVI, sipas traditës, bekoi dje shtatoret e Foshnjës Hyjnore për Shpellat
e Betlehemit të oratoreve e të famullive romake, që i mbanin në duar fëmijët e shkollave.
“Gëzim
i vërtetë është ai, që na bën të ndjejmë se jeta jonë personale e komunitare vizitohet
e mbushet plot nga një mister i madh, misteri i dashurisë së Zotit”. Me këto fjalë
i përshëndeti Papa fëmijët e mbledhur në Shesh për bekimin tradicional të Shtatoreve
të Krishtit Fëmijë. “Të shumëdashur, ju përshëndes të gjithëve me dashuri
të madhe e ju falënderoj për praninë tuaj. Gëzohem që në familjet tuaja ruhet zakoni
për të bërë Shpellën e Betlehemit. Por duhet ta dini se nuk mjafton përsëritja e një
gjesti tradicional, sado i rëndësishëm qoftë. Duhet ta jetosh në realitetin e të gjitha
ditëve, atë që përfaqëson Shpella e Betlehemit: dashurinë e Krishtit, përvujtërinë
e Tij, varfërinë e Tij”. Në të Dielën III të Kohës së Ardhjes, Benedikti
XVI kujtoi se Shën Françesku, në Greço, e paraqiti të gjallë skenën e Lindjes së Krishtit,
që ta kundronte e ta adhuronte, por sidomos, që ta vinte më mirë në jetë mesazhin
e Birit të Zotit, i cili nga dashuria për ne u zhvesh nga gjithçka e u bë fëmijë i
vogël. Bekimi i shtatoreve të Foshnjës Hyjnore – nënvizoi Papa – na kujton se Shpella
e Betlehemit është shkollë jete: “Shikojmë Shpellën e Betlehemit: Zoja e
Shën Jozefi nuk na duken familje fatlume: pritën ferishten e tyre të parë mes trazirash
të mëdha; e megjithatë, janë gjithë gëzim, sepse e duan dhe e ndihmojnë njëri-tjetrin
e, mbi të gjitha, janë të sigurtë se historia e tyre është vepër e Zotit, i cili u
bë i pranishëm në Jezusin e vogël”. Më pas Papa shtoi: “E
barinjtë? Pse u dashka të gëzohen? Ky i Posalindur sigurisht nuk do ta ndryshojë varfërinë
e mjerimin e tyre. Por feja i ndihmon të shohin në Fëmijën e mbështjellë me shpërgënj,
të vënë në grazhd, shenjën e përmbushjes së premtimeve të Hyjit për të gjithë njerëzit
‘që ai i do’, e edhe për ta”. Gëzimi nuk lind vetëm nga sendet, por kryesisht
nga dashuria e vërtetësia, tha Papa. Kemi nevojë për një Zot të afërt, i cili na e
ngroh zemrën e i përgjigjet shpresave tona. Ky Zot u dëftua në Jezusin, që lindi nga
Virgjëra Mari. Prandaj kjo Foshnje, që e vendosim në kasolle a në shpella, është qendra
e çdo gjëje, është zemra e botës. Pas lutjes mariane, një falënderim drejtuar Qendrës
së Oratoreve Romake, që organizoi manifestimin e ‘Shtatoreve’ dhe një mendim për Ditën
kushtuar kishave të reja, organizuar nga Dioqeza e Romës.Pastaj, kujtimi i katër misionarëve
të vrarë në disa vende afrikane gjatë javës së kaluar: “Është fjala
për Meshtarët Atë Daniel Cizimia, Atë Lui Blondel, Atë Gerri Rosh e Motër Dënisë Kahabu.
Ishin dëshmitarë të Ungjillit, të cilin e kumtuan me guxim, duke rrezikuar edhe jetën.
Ndërsa u shpreh afërsinë familjarëve dhe bashkësive të tyre në zi, i ftoj të gjithë
të bashkohen me lutjen time, që Zoti t’i pranojë misinarët e vrarë në Shtëpinë qiellore,
t’i ngushëllojë ata që vajtojnë për këtë humbje e të sjellë, me ardhjen e Tij, pajtim
e paqe”.