Ipeshkvijtë e Irlandës: kërkojmë të falur për abuzimet seksuale.
(10.12.2009 RV)Në prag të audiencës që ipeshkvijtë irlandezë zhvillojnë nesër
me Papën Benedikti XVI, konferenca ipeshkvnore irlandeze reflekton mbi abuzimet me
të miturit të kryera nga ana e disa meshtarëve të kryeipeshkvisë së Dublinit. Pikërisht
këto akte të shëmtuara ishin në qendër të diskutimeve të takimit dimëror të prelatëve
irlandezë zhvilluar dje dhe sot në qytetin Majnoth. Dje, ipeshkvijtë e vendit dolën
me një komunikatë ku kërkojnë të falur publikisht për abuzimet me të miturit. Gjatë
kësaj mbledhjeje u shqyrtua raporti i komisionit qeveritar të hetimeve mbi abuzimet
që kanë ndodhur në kryeipeshkvinë e Dublinit dhe që është bërë publik me 26 nëntorin
e kaluar. “Ne, - lexohet në një deklaratë e djeshme të ipeshkvijve, - i kërkojmë të
falur të gjithë atyre me të cilët meshtarët kanë abuzuar: fëmijëve, familjeve të tyre
dhe të gjithë personave që me të drejtë e ndjejnë veten të indinjuar dhe të zhgënjyer
nga mungesa e autoritetit moral dhe e përgjegjësisë që del nga raporti qeveritar.” Si
përgjigje e parë ndaj këtij raporti, - thuhet në komunikatë, - kemi vendosur t’i paraqesim
një kërkesë Këshillit Kombëtar për Mbrojtjen e të miturve në Kishën Katolike, që të
shqyrtojë, së bashku me organet qeveritare dhe autoritetet kompentente, në mënyrë
që masat e marra nga Kisha Katolike në lidhje me tutelimin e të miturve të jenë optimale
dhe akuzat për abuzime të trajtohen në mënyrë të përshtatshme”. Më tej konferenca
ipeshkvnore irlandeze ripohon se është “thellësisht e tronditur nga përmasat e abuzimeve
ashtu siç përshkruhen në raport.” Ipeshkvijtë ndihen të turpëruar për mënyrën sesi
Kryeipeshkvia e Dublinit i ka mbuluar këto abuzime seksuale me të mitur, duke theksuar
se ky fakt tregon se kjo lloj praktike ishte e përhapur në Kishën irlandeze. “Shmangia
e skandalit, lexohet më tej në deklaratën e ipeshkvijve irlandezë, - dhe ruajtja e
reputacionit të disave dhe të Kishës morën përparësi e kështu siguria dhe mirëqenia
e fëmijve doli në plan të dytë. Këndej buron edhe keqardhja e thellë e prelatëve sepse
“kjo nuk duhet të kishte ndodhur kurrë dhe nuk duhet lejuar që të ndodhë kurrë më.” Më
poshtë, në këtë deklaratë, ipeshkvijtë nënvizojnë se “raporti qeveritar ngre shumë
probleme të rëndësishme për Kishën në Irlandë, përfshi edhe funksionimin e Konferencës
Ipeshkvnore dhe mënyrën sesi besimtarët laikë mund të përfshihen aktivisht në jetën
e Kishës”. Ndërsa në lidhje me mbajtjen të fshehtë të këtyre skandaleve, prelatët
pohojnë kategorikisht se nuk ka justifikime “për ta fshehur të keqen”. “Dashuria,
e vërteta, integriteti i personit dhe transparenca – pohon Konferenca Ipeshkvnore
duhet të jenë pikat e referimit të komunikimit tonë.” Në fund, duke kërkuar që të
lutemi përvujtërisht për të gjithë ata që kanë qenë viktima të abuzimeve, deklarata
kujton se nesër me 11 dhjetor, kardinali Shon Bredi, kryetar i Konferencës Ipeshkvnore
Irlandeze dhe Imzot Diarmyd Martin, kryeipeshkëv i Dublinit, do të priten në audiencë
nga Papa, me ftesën e vetë Benediktit XVI “për ta informuar atë dhe për të vlerësuar
gjendjen e dhimbshme të Kishës në Irlandë pas publikimit të raportit qeveritar të
Komisionit Marfi”.