Parlamenti Evropian nxit regjimin pa viza për Vendet e Ballkanit perëndimor
(07.12.2009 RV)Kryetari i Delegacionit të PE-së për marrëdhëniet me Evropën
Juglindore, Eduard Kukan, shpreh besimin se Shqipëria do të përfitojë së shpejti liberalizimin
e vizave. "Parlamenti Evropian vazhdon të jetë një nxitës i fortë i regjimit pa
viza për të gjitha vendet e Ballkanit Perëndimor, pasi të jenë përmbushur të gjitha
kërkesat për liberalizimin e vizave", deklaroi sot në Tiranë, z. Eduard Kukan, përfaqësues
i Kryetarit të Parlamentit Evropian, Jerzy Buzek dhe Kryetari i Delegacionit të PE-së
për marrëdhëniet me Evropën Juglindore. Z. Kukan përshëndeti sot punimet e
konferencës rajonale dyditore me temë "Forcimi i bashkëpunimit në fushën e sigurisë
për një anëtarësim të shpejtë të Europës Juglindore në Bashkimin Europian", e cila
po zhvillon punimet në ambientet e Hotel "Tirana Internacional", me nismën e Kuvendit
të Shqipërisë. Viti 2009 ka qenë shumë i rëndësishëm për Shqipërinë, tha z.
Kukan, duke u ndalur te dy prej ngjarjeve më të rëndësishme, siç ishte anëtarësimi
në NATO dhe pranimi i kërkesës për statusin e vendit kandidat në BE. Por sipas
tij, "viti 2009 ka qenë shumë i rëndësishëm edhe për të gjithë Evropën Juglindore
dhe sidomos për Ballkanin Perëndimor, pasi nga 19 dhjetori qytetarët e Maqedonisë,
Malit të Zi dhe Serbisë do të udhëtojnë në zonën Shengen të BE-së pa detyrimin për
të pasur një vizë". Në këtë drejtim, z. Kukan u shpreh optimist se "edhe qytetarët
e Shqipërisë do ta gëzojnë këtë të drejtë shumë shpejt, ashtu sikurse edhe Kosova
në të ardhmen". Një tjetër event shumë i rëndësishëm në kuadër të procesit
të integrimit është edhe ratifikimi i Traktatit të Lisbonës, që sipas z. Kukan, "rikonfirmoi
konsensusin e BE-së për zgjerimin e mëtejshëm, si dhe kapacitetet për të integruar
vende të reja anëtare". "Askush nuk mund të thotë më se BE nuk ka kapacitetet
institucionale për t'u zgjeruar më tej. Këto kapacitete janë, dhe në këtë mënyrë është
përmbushur një nga kushtet e BE-së", tha z. Kukan, ndërsa vlerësoi se "procesi i zgjerimit
në përgjithësi ka qenë një instrument shumë efektiv për të realizuar ndryshime demokratike,
si dhe për të siguruar stabilitetin dhe sigurinë në Evropën Lindore dhe Qendrore".
Duke theksuar se zgjerimi ka rezultuar si një nga politikat më të suksesshme
të BE-së, z. Kukan u shpreh se "i gjithë ky proces ka kontribuar në rritjen e sigurisë
në Evropë". "Nga viti 1998 deri në 2006 kam qenë dëshmitar i ndryshimeve dhe transformimeve
në kontinentin europian. Perspektiva e anëtarësimit në BE ka qenë një nga promotorët
e rëndësishëm në nxitjen e shumë proceseve zhvilluese në rajon, si dhe për konsolidimin
e paqes dhe stabilitetit", vijoi ai. Në këtë drejtim, z. Kukan vlerësoi se
"përgjithësisht, të gjitha vendet e Ballkanit Perëndimor kanë ndjekur objektivat për
anëtarësimin në BE me gjithë sfidat e forta që iu është dashur të përballojnë".
Sipas tij, "garantimi i shtetit ligjor është kusht i domosdoshëm për zhvillimin demokratik
dhe social të një vendi dhe një nga kushtet e rëndësishme për anëtarësimin në BE".
"Liria e shtypit, si dhe bashkëpunimi me Gjykatën Ndërkombëtare për ish-Jugosllavinë,
është edhe një tjetër çështje e rëndësishme, një kusht për këto vende që të përmbushim
kërkesat për anëtarësimin në BE", tha z. Kukan. Duke vlerësuar bashkëpunimin
rajonal, si një element të rëndësishëm në kuadër të anëtarësimit në BE. z. Kukan u
shpreh se "kërkohet zgjidhja e problemeve ndërkufitare, problemeve të pronave, bashkëpunimi
gjyqësor, si dhe forcimi i kapaciteteve administrative për të punuar më mirë në kuadër
të marrëdhënieve midis vendeve në rajon". "Për t'u anëtarësuar në BE është e
rëndësishme që të gjitha vendet e rajonit të marrin përsipër përgjegjësitë. Është
e rëndësishme që të shmanget çfarëdolloj kthimi prapa në këtë proces dhe të gjendet
mënyra për realizimin e këtyre objektivave dhe për kapërcimin e këtyre vështirësive
në të ardhmen", tha z. Kukan. Kryetari i Delegacionit të PE-së për Marrëdhëniet
me Evropën Juglindore shprehu bindjen se "perspektiva europiane për vendet e rajonit
të Evropës Juglindore ka qenë një faktor stabiliteti dhe progresi, si dhe një granci
për transformimet demokratike dhe ekonomike në këto vende". "Vendet e Evropës
Juglindore i përkasin Europës. Ka qenë gjithmonë kështu dhe do të jetë kështu, pasi
pa këto vende Evropa nuk do të jetë e plotë, por BE-ja është një institucion dhe ju
duhet që të ngrini standardet për t'u bërë pjesë e këtij grupi. Askush nuk mund ta
bëjë këtë gjë për ju, por vendet tuaja duhet të punojnë në këtë drejtim. Kujtoni që
PE është gjithmonë atje për t'ju ndihmuar", tha në përfundim z. Kukan. nga ATSH-ja