Papa: ideologjia marksiste ka sjellë shumë të këqija e vuajtje!
(07.12.2009 RV)Nesër Shqipëria në festë, do të përkujtojë fillimin e kthesës
së madhe historike të 8 dhjetorit 1990, me nismën e një grupi studentësh e pedagogësh
universitarë. Përkujtohet fillimi i protestave paqësore, që patën si pasojë fundin
e epokës së vetizolimit. Prandaj Kuvendi i Shqipërisë e shpalli 8 dhjetorin ‘Dita
e Rinisë dhe e Pluralizmit’. Konsiderohet, pra, si dita, kur shqiptari siguroi,
më në fund, të drejtën për të ecur i lirë në rrugët e ideologjive e të botës.
Në
këtë kontekst, po kujtojmë fjalët e Benediktit XVI, i cili në fundjavën e
kaluar, foli tri herë për ideologjinë e terrorit, duke e krahasuar me ideologjinë
e demokracive perëndimore. Ati i Shenjtë dënoi haptazi të këqijat që solli ideologjia
marksiste në tri vende të ndryshme të botës, duke nisur pikërisht nga Shqipëria ku,
për shkak të regjimit ateist tejet shtypës e kundërshtar i rreptë i fesë, shumë
të krishterë e paguan besimin e tyre me çmimin e jetës. Në Gjermani, pastaj, kumunizmi
ngriti një mur, që për 40 vjet rresht e copëzoi vendin në dy pjesë. Kufi vdekjeje,
ky, që ndau njerëz, familje, të afërm e miq. Në Amerikën Latine, së treti, me
teorinë e çlirimit, që solli rebelimin, përçarjen, pakënaqësinë, fyerjen, anarkinë.
E të gjitha këto, pasojë e pranimit, pa frymë kritike, të tezave e të metodologjive,
hyrë në doktrinën e krishterë nga ideologjia marksiste. Pas takimit, të premten
a kaluar, me Kryepeshkopin ortodoks të Tiranës, Durrësit dhe gjithë Shqipërisë, Fortlumturinë
e Tij Anastas, dhe fjalimit të mbajtur po atë mbrëmje, në përfundim të koncertit,
ofruar në Kapelën Sikstine nga presidenti gjerman, Horst Koehler, me rastin e 20-vjetorit
të shembjes së Murit të Berlinit, Papa vuri fort theksin mbi dëmet, që ideologjia
komuniste vijon të shkaktojë edhe sot e kësaj dite, kudo që sundon, haptaz a në mënyrë
të maskuar, duke u përpjekur ta rifitojë sundimin, atje ku e humbi. E ky theksim doli
në pah veçanërisht në takimin me ipeshkvijtë e Brazilit, gjatë vizitës së tyre ‘ad
Limina’ në Vatikan. Benedikti XVI shpjegoi se ndikimi shkatrrimtar i ideologjisë
marksiste mbi Kishën në Brazil, e bëri atë të vuajë shumë e të humbasë forcat e saj
më të gjalla. “U lutem të gjithë atyre që, në një mënyrë a një tjetër, ndikohen
a impenjohen shpirtërisht në mbrojtje të disa parimeve të rreme të teologjisë së çlirimit,
të ballafaqohen me Udhëzuesin vatikanas, duke e pranuar ndriçimin, që buron prej tij".
Benedikti XVI e ka fjalën për udhëzuesin ‘Libertatis nuntius”, nënshkruar 25 vjet
më parë prej tij, kur ishte Prefekt i Kongregatës për Doktrinën e Fesë. Papa teolog
u kujtoi ipeshkvijve të Brazilit se rregullin më të lartë të fesë e gjejmë tek ‘uniteti,
që vendos Shpirti Shenjt në Trininë Hyjnore’, tek Shkrimi Shenjt e tek Magjisteri
i Kishës, në një përkim të tillë, që asnjëri nga këto tre elemente nuk mund të mbahet
në këmbë, pavarësisht nga tjetri. Në Kapelën Sikstine Benedikti XVI bëri një pyetje
kyçe, thellësisht ndriçuese e aktuale: “A mund të themi se rendi shoqëror perëndimor
ishte shumë më i mirë e më humanitar, se ai i regjimeve marksiste? Historia e Republikës
Federale të Gjermanisë – u përgjigj Papa – na e provon qartë këtë. E provë tjetër
është edhe zhvillimi paqësor i Gjermanisë së përtej gardhit, pas gjashtë dekadash
të kaluara në natën e errët të dhunës e të shtypjes, nën thundrën e hekurt të sistemit
totalitar".