Rubrika “Shtigjeve të Krishtlindjes”: “Një britmë në shkretëtirë”.
(06.12.2009 RV)Sa ditë na ndajnë nga ardhja e Krishtit mes nesh? Në emisionin
tonë të shtatë, kushtuar pritjes së Zotit, zëri i Profetit ushton në shkretëtirë,
duke na ftuar t’ia shtrojmë rrugën Zotit, të shpejtojmë hapin “Shtigjeve të Krishtlindjes”
2009, për të dalë nga përcëllimi i shkretëtirës në dritën e jetës. E ne e dimë se
Profeti nuk është si gjithë të tjerët, nuk rrëfen përralla, për të dëfryer të mëdhenjtë,
të pushtetshmit, ata që besojnë se i kanë në dorë fatet njerëzore. Profeti nuk diskuton,
flet. E kur flet, shqetëson, trondit. Disa çuditen e shkandullohen e kujtojnë se po
dëgjojnë një të çmendur. Po ai vijon të flasë, të bërtasë në shkretëtirën e jetëve
tona, pa pyetur për jetën e vet:
E Ungjilli i sotëm na kujton pikërisht:
“Zërin e atij që bërtet në shkreti: ‘Përgatitni rrugën Zotit, Rrafshoni
shtigjet e tija! E çdo njeri të shohë shëlbimin e Hyjit”. (Lk.
3, 3-6)
“Një britmë jehon në shkretëtirë! Shkretëtira
është vend ku gjithçka mund të ndodhë. Në zemër të shkëmbit e të rërës që
përcëllon, Profeti gatit britmën, që Fjala t’zbresë mbi ne. Fjala e thjeshtë, që
prek zemrat. Fjala, që hyn pa droje në tytsinë e shtëpive tona, që hyn në
shpirt. Kur mbi stomije të rërës nis fryn e shfryn shiroku, duhet të presësh
sa të kalojë era, që përcëllon. Atëherë mund të dalësh nga toka e zjarrit e
të shkelësh në tokë të njeriut, e endacakëve t’ua lesh shkretëtirën e përvëluar. Erdh
koha të dëgjojmë zërin e Profetit: “Ejani t’i shtrojmë rrugët, Mesia është
në prag”. Tashmë jehona e fjalës përshkon gjithë viset tona. Mes nesh vjen
me ngritë plang e me ndreqë shtëpi. Dy sytë e ndritur na i lë mu ndër sy, e
flakën e dëshirës, për tokën pa zjarre, e shpirtin pa dhimba e dheun pa varre!"