Адбываецца дапрацоўка праекта Канкардату паміж Беларусьсю і Ватыканам
Супрацоўнікі Апарата Упаўнаважанага па справах рэлігій і нацыянальнасцяў удзельнічаюць
у дапрацоўцы праекта канкардату паміж Беларуссю і Ватыканам па просьбе Міністэрства
замежных спраў Беларусі. Аб гэтым паведаміў 2 снежня 2009 г. упаўнаважаны па справах
рэлігій і нацыянальнасцяў у Беларусі Леанід Гуляка падчас оnline канферэнцыі на сайце
інфармацыйнага агенцтва «БелТА». «Неабходна прымаць пад увагу, што Ватыкан — гэта
самастойная і незалежная дзяржава, таму дагаворныя адносіны з ім могуць мець менавіта
міжнародны характар, з захаваннем усіх патрабаванняў, прадугледжаных для міжнародных
дагавораў», — адзначыў Леанід Гуляка, дадаўшы, што гэтыя пытанні знаходзяцца ў кампетэнцыі
Міністэрства замежных спраў. Упаўнаважаны па справах рэлігій і нацыянальнасцяў
нагадаў таксама аб візіце ў нашу краіну ў чэрвені 2008 г. Дзяржаўнага сакратара Яго
Святасці папы Бэнэдыкта XVI кардынала Тарчызіо Бэртонэ, з якім сустракаўся Прэзідэнт
Беларусі Аляксандр Лукашэнка. Падчас сустрэчы абмяркоўваліся перспектывы развіцця
Каталіцкага Касцёла ў Беларусі, у тым ліку і магчымасць заключэння канкардату паміж
дзяржавамі.
Артыкулам 16 Канстытуцыі Рэспублікі Беларусь устаноўлена,
што ўзаемаадносіны дзяржавы і рэлігійных арганізацый рэгулююцца законам з улікам іх
уплыву на фарміраванне духоўных, культурных і дзяржаўных традыцый беларускага народа.
Пры гэтым артыкул 8 закона «Аб свабодзе сумлення і рэлігійных арганізацыях» паведамляе,
што дзяржава можа будаваць свае адносіны з рэлігійнымі аб’яднаннямі шляхам заключэння
пагадненняў у адпаведнасці з грамадзянскім заканадаўствам краіны.
З улікам
гэтага 12 чэрвеня 2003 г. было падпісана Пагадненне аб супрацоўніцтве паміж Беларуссю
і Беларускай Праваслаўнай Царквой. Пазней, як паведаміў Леанід Гуляка, органамі дзяржаўнага
кіраўніцтва і Беларускім Экзархатам у адпаведнасці з пагадненнем былі распрацаваны
і падпісаны 14 сумесных праграм супрацоўніцтва.