Tryeza e paqes: t’i jepet zë Betlehemit të mbyllur pas murit!
(02.12.2009 RV)Pak ditë para Krishtlindjes, Flavio Loti, koordinator italian
i Tryezës së paqes, bën thirrje për të mos e harruar Betlehemin. Tradita – pohon
koordinatori – na kujton se Jezusi lindi në një shpellë, jo larg Betlehemit, të cilit
sot po i zihet fryma nga muri i madh e nga pushtimi i rreptë ushtarak, që vijon prej
dhjetë dekadash. Banorët e Betlehemit, të gjithë fëmijë, gra e pleq, njerëz të ligshtë,
jetojnë në kushte gjithnjë më të vështira. Janë të burgosur nën qiellin e hapur! Ndërtimi
i murit dhe ngulimet e reja izraelite, grabitja e trojeve e kufizimet e shumta fizike
dhe administrative e kanë shkatërruar ekonominë e qytetit, duke i bërë gjithnjë më
të vështira kushtet e jetesës. Prej këndej buron thirrja drejtuar gazetarëve dhe
përgjegjësve të informacionit , t’i ndezin të gjithë reflektorët e mundshëm mbi Betlehemin
e t’i tregojnë mbarë njerëzimit ç’do të thotë të lindësh e të jetosh sot, atje ku
dymijë vjet më parë lindi, jetoi, vdiq e u ngjall Jezusi. E kjo do të thotë edhe t’i
japësh zë, atyre që s’kanë zë, viktimave të pafajshme të padrejtësisë, në një botë
që, me sa duket, e ka ndër mend të mbetet mizore, si në kohën e Herodit.