(01.12.2009 RV)Duke filluar nga dita e sotme, me hyrjen në fuqi të Traktatit
të Lisbonës, Bashkimi Evropian do të ketë presidentin e vet të përhershëm dhe ministren
e parë të punëve të jashtme. Ata janë ish-kryeministri belg Herman Van Rompy, 62 vjeç
dhe ish-komisarja për tregtinë e jashtme, Katerinë Ashton, 53 vjeçe. Në një deklaratë
presidenti i Komisionit Evropian Hoze Manuel Barrozo nënvizoi se zbatimi i Traktatit
të Lisbonës do të përmirësojë veprimtarinë e BE dhe do ta bëjë Evropën më shumë të
dukshme në arenën ndërkombëtare. Falë këtij Traktati - shtoi Barrozo, - Evropa do
të jetë më e përgatitur për t’iu përgjigjur problemeve në sektorin e energjisë dhe
në atë të ndryshimeve klimatike; për kriminalitetin ndërkufitar dhe emigracionin.
Lisbona
po e feston sonte me një ceremoni të shkurtër dhe me fishekzjarre hyrjen në fuqi të
Traktatit që mban emrin e saj. Pikërisht me hyrjen në fuqi të këtij traktati Evropa
do të reformojë institucionet e veta dhe funksionimin e tyre. Me të parlamenti evropian
që është i vetmi organ që zgjidhet drejtëpërdrejt nga votuesit, do t’i forcojë shumë
kompetencat e veta. Për shembull do të ketë kompetenca të padiskutueshme për bujqësinë,
emigracionin, bilancin, fondin struktural, që deri më sot kanë qenë jashtë sferave
të kompetencave të tij. Por si do të jetë Evropa me 27 vendet anëtare? Në mikrofonin
tonë flet prof. Vinçenco Buonomo, Docent i së Drejtës Ndërkombëtare pranë Universitetit
Papnor Lateranens:
Përgjigje: Sigurisht është një Evropë që do të përpiqet
t’i përforcojë cilësitë e veta operative jo vetëm përsa i përket efikasitetit por
edhe rezultateve konkrete që kanë të bëjnë me të gjithë qytetarët. Kjo është një Evropë
që ka nevojë të kalojë nëpër shumë faza, që të bëhet përnjëmend një sistem i integruar.
Nuk jemi përballë një Evrope federale, siç kishte parashikuar Kushtetuta e nënshkruar
në Romë më 2004, por jemi përballë një procesi ndërqeveritar që është më shumë i integruar.
Disa faktorë bien në sy menjëherë. E kam fjalën për figurën e Presidentit të Këshillit
Evropian që do të qëndrojë në detyrë dy vjet e gjysmë dhe jo gjashtë muaj, si dhe
për Përfaqësuesen e Lartë të Politikës së jashtme të përbashkët ndonëse kjo gjë mbetet
ende në duart e shteteve anëtare, ngaqë nuk ka akoma një shkrirje të plotë të kompetencave
të Bashkimit në këtë pikë.
Pyetje: Pikërisht në këtë pikë ka ende shumë çështje
të rëndësishme që mbeten kompetencë e secilit prej shteteve. Pse nuk është ecur përpara
në këtë drejtim?
Përgjigje: Unë besoj se shtetet anëtare, me shumë realizëm,
kanë vën re se jemi ende shumë larg nga idea e një Federate të Shteteve Evropiane.
Secili e ruan me xhelozi sferën e vet të sovranitetit, dhe kuptohet edhe atë të vendim-marrjes.