Papa përkujton 25 vjetorin e paqes ndërmjet Argjentinës e Kilit, ndërmjetësuar nga
Gjon Pali II: një shembull si të shmangen barabaritë e luftës
(28.11.2009 RV)Në Pallatin Apostolik
u zhvillua paradite një përkujtim i rëndësishëm. Duke pritur në audiencë presidentet
e Argjentinës e të Kilit, Kristina Fernàndez de Kirshner dhe Mishelë Bashëlè, Benedikti
XVI kujtoi 25 vjetët që kanë kaluar nga ndërmjetësimi historik i Papës Gjon Pali II,
i cili, në vitin 1978, arriti të shmangte konfliktin e armatosur ndërmjet dy shteteve.
Ata kishin divergjenca për sovranitetin mbi një hapësirë detare strategjike për kalimin
nga Oqeani Atlantik në atë Paqësor, divergjenca që zgjasnin prej 100 vjetësh. Nënshkrimi
i dokumentit zyrtar, më 1984, njohu sovranitetin e Kilit mbi atë copë deti. Ja si
e kujtoi Papa Benedikti XVI: “Traktati i Paqes dhe i Miqësisë si edhe ndërmjetësimi
që e bëri atë të mundur, është i lidhur pazgjidhshmërisht me figurën e dashur të Gjon
Palit II, i cili, i shtyrë nga ndjenjat e miqësisë për ato kombe e në vijim të punës
së tij të palodhur si lajmëtar e protagonist i paqes, nuk hezitoi të pranonte detyrën
delikate e të rëndësishme të ndërmjetësimit në këtë konflikt”. Një detyrë,
që Papa Gjon Pali II e kreu me sukses, falë edhe ndihmës së personaliteteve të tjera
kishtare, ndërmjet të cilëve Benedikti XVI kujtoi kardinalin Samoré dhe sekretarin
e atëhershëm të Shtetit të Vatikanit, kardinalin Agostino Kazaroli. E nënshkrimi i
Traktatit të Paqes e të Miqësisë nuk ka vlerë vetëm për atëherë, e vetëm për Kilin
e Argjentinën, por, shtoi Papa: “…është shembull i ndritshëm i forcës së shpirtit
njerëzor e të dëshirës për paqe kundër barbarive dhe çmendurisë së dhunës e të luftës,
si mjet për të zgjidhur divergjencat… Prandaj, është e rëndësishme, që në çdo moment,
të vazhdohen me vullnet e deri në fund përpjekjet për të zgjidhur konfliktet, me një
dëshirë të vërtetë për dialog e marrëveshje, përmes bisedimeve plot durim e impenjimeve
të nevojshme, duke marrë parasysh rivendikimet e drejta dhe interesat e ligjshme të
të gjithëve”. Kjo është e mundur, pohoi Papa, vetëm nëse përgjegjësit e politikës
e të kombeve mbështeten mbi bindje të forta morale, karakterizohen nga qetësia e shpirtit
e nga kërkimi i vazhdueshëm i së mirës së përbashkët kombëtare, rajonale dhe botërore: “Arritja
e paqes, në të vërtetë, parashikon promovimin e një kulture të vërtetë të jetës, që
të respektojë dinjitetin e njeriut në tërësinë e tij, bashkuar me forcimin e familjes
si celula themelore e shoqërisë. Kërkon edhe luftën kundër varfërisë e korrupsionit,
mundësinë për arsimimin cilësor për të gjithë, mbështetjen e rritjes ekonomike, konsolidimin
e demokracisë dhe zhdukjen e dhunës e të shfrytëzimit, në veçanti kundër grave e fëmijëve”.