(27.11.2009 RV)Kriza e Perëndimit
lind ngaqë ai nuk e njeh mirë kulturën e Lindjes. Vetëm përmes dialogut ndërmjet këtyre
dy qytetërimeve do të jetë i mundur krijimi i një botë të re me shpresa të mëdha e
me mundësi të jashtëzakonshme. Ky qe thelbi i takimit të djeshëm mbi temën “Kriza
e Perëndimit? Dritëhijet e një ideje”, i cili u mbajt në Romë, promovuar nga Zyra
dioqezane për baritorinë e universitarëve. Por mbi këtë temë të dëgjojmë filozofin
Franko Kardini, pedagog në Universitetin e Firences: Perëndim është
sinonim i modernitetit, madje, Perëndimi është vetë moderniteti. Në këtë moment jemi
në prag të një përmase të re. Perëndimi konsiderohej modern, pasi kishte hequr dorë
nga feja, por u pa qartë se fetë kishin gjallërinë e tyre, se po rilindin e prandaj
e kemi kapërcyer kufirin e Perëndimit modern. Duhet të gjejmë një ekuilibër të ri.
Këto lloj ekuilibrash i kanë quajtur post-moderne, ose në njëmijë mënyra të tjera,
por akoma po i kërkojmë. Sipas jush cilat janë vlerat që Perëndimi ka arritur
të eksportojë? E ku ka dështuar? Perëndimi ka eksportuar kryesisht vlera shkencore,
vlera teknologjike e modele politike, e madje, i ka shitur ato shtrenjtë, pasi ka
shfrytëzuar ekonomitë, ka dominuar si kolonialist… Natyrisht, ka eksportuar edhe një
tharm të rëndësishëm, që është tharmi i lirisë, i të drejtave të njeriut. Por ato
u kthyen kundër Perëndimit, pasi ai vetë nuk i respektonte i pari në këto vende. Nga
ana tjetër, Perëndimi nuk ka rritur të japë një vizion autonom e të qëndrueshëm të
botës, pasi la mënjanë krishterimin, por nuk arriti të krijonte një shoqëri krejtësisht
laike. Post-modernizmi karakaterizohet nga kundërshtimi i këtij mënjanimi, nga dështimi
i procesit të shekullarizimit. Tani që jemi të rrethuar nga fondamentalistë, shohim
qartë se edhe ky projekt i Perëndimit ka dështuar. Pra, Perëndimi ka hedhur farën
e mirë të lirisë, por e ka bërë këtë me detyrim, duke shtypur e shfrytëzuar të tjerët.
Pikërisht nga kjo përpiqen të çlirohen tani popujt e tjerë e unë mendoj, se edhe nëse
Perëndimi do të vdesë, qytetërimi nuk humbet. Do të kalojmë në një ekuilibër të ri… Sipas
jush, në ç’mënyrë mund të ndihmojë krishterimi për kapërcimin e këtij momenti tranzicioni? Shikoni
se momenti i tranzicionit varet nga shumë çështje, nga shumë rrethana e marrëdhënie;
por njëra është themelore: padrejtësia që mbretëron e pashqetësuar në botë. Një botë,
ku 90% e popullsisë, pra rreth 5 miliard jeton nën pragun e mbijetesës, ndërsa pasuria
është e përqëndruar në shumë pak duar e vetëm një miliard persona gëzojnë, në një
mënyrë jo të barabartë, frytet e kësaj pasurie. Krishterimi e jo vetëm ai, por edhe
fetë e tjera, kanë atë ngarkesë humanizmi, bamirësie, altruizmi, që sot është e nevojshme,
pasi fundi i Perëndimit është edhe fundi i një sistemi, që e vishte padrejtësinë me
rroben e lirisë, duke harruar se liria e të paktëve përkon me jo-lirinë e të shumtëve
e, se nuk ekziston vetëm “liria e…” – liria e mendimit, liria e fjalës, liria e krijimit
të shoqatave – por ekziston edhe një “liri nga…”: liria nga uria, liria nga frika,
liria nga sëmundja. Të gjitha këto liri, sistemi hegjemonist i Perëndimit – megjithëse
jo krejtësisht – i ka mohuar ose nënvlerësuar për 80% të botës.