Imzot Tomazi: demokracitë nuk mund ta anashkalojnë dukurinë e emigracionit. Të mbrohen
të drejtat e emigrantëve e të mos shfrytëzohen.
(26.11.2009 RV)Nuk duhen kriminalizuar
emigrantët e parregullt vetëm e vetëm pse janë të tillë. Kjo është thirrja që bëri
Imzot Silvano Maria Tomazi, duke folur dje gjatë sesionit të 98 të Këshillit të Organizatës
Ndërkombëtare të Migracioneve. Vëzhguesi i përhershëm i Selisë Shenjte pranë Zyrës
së OKB-së në Gjenevë, i ftoi shtetet pjesëmarrëse të zhvillojnë një strategji të përgjithshme
për mbrojtjen e të drejtave të emigrantëve si edhe t’i çrrënjosin paragjykimet kundrejt
tyre. Në mikrofonin tonë flet pikërisht Imzot Silvano Maria Tomazi. Ta dëgjojmë:
Përgjigje:
Përpara së gjithash do të thosha se ajo çka të bën përshtypje është se një pjesë e
madhe e njerëzimit nuk është në rregull me dokumentet administrative. Bëhet fjalë
për 30 deri në 40 milionë vetë, pra, afërsisht 15 përqind apo 20 përqind e 214 milionë
emigrantëve të njohur nga Kombet e Bashkuara nëpër botë. Tashti, shqetësimi kryesor
që ka Kisha lidhur me këtë masë të madhe njerëzish është se këta bëhen pré e abuzimeve
dhe e shfrytëzimit. Prandaj, mbi të gjitha shtetet që duan ta bëjnë demokracinë të
përparojë, nuk mund ta anashkalojnë këtë dukuri.
Pyetje: Emigracioni
i parregullt shpeshherë lidhet me forma të shfrytëzimit të punës, të varfërisë, dhe
në fund të fundit të të drejtave të njeriut. Si mund ta prishim këtë rreth vicioz.
Përgjigje:
Përpara së gjithash do të thosha se është mundësia për një vend pune që i shkakton
këto valë emigrantësh, jo vetëm në vendet perëndimore por edhe të tjera. Tashmë kjo
është një dukuri globale, pra do të thosha se është e arsyeshme, në interesin e të
gjithëve, që të krijohen kanale ligjore për lëvizjen e njerëzve në mënyrë që ndërmarrjet
e vogla e të mesme të cilat zakonisht i marrin në punë emigrantët e parregullt ngaqë
kanë përfitime, të vihen në rregull me ligjin. Ndoshta edhe me pjesëmarrjen e shtetit,
duke iu bërë lëshime këtyre ndërmarrjeve, që ta lehtësojnë vënien në rregull. Rreziku
i shfrytëzimit, ai i abuzimit do të zhdukej sikur të kishte një bashkërendim më të
mirë të punës nga ana e shteteve të interesuara. Mbi të gjitha të hapen kanale ligjore,
të kihet parasysh se nuk është ilegal emigranti që vjen të punojë, sepse emingrantët
punojnë në vende që janë krejtësisht ligjore, por sistemi, kanalet nëpër të cilat
përshkohet emigranti janë të tilla. Janë këta që e bëjnë të vështirë këtë problem
dhe i fusin njerëzit në situata të vështira.