Në festën liturgjike të Shën Klementit, kujtojmë mësimin e Benediktit XVI: Kisha nuk
është strukturë politike.
(23.11.2009 RV)Kisha kremtoi sot Shën Klementin Romak, Pasardhës i katërt i
Shën Pjetrit, i nderuar që në shekujt e parë të krishterimit me titullin e martirit.
Këtij Ati të madh të Kishës Benedikti XVI i ka kushtuar katekizmin e audiencës së
përgjithshme të 7 marsit 2007. Në mënyrë të posaçme Papa ndalet tek Letra e Shën Klementit
drejtuar korintianëve, dokument që përmban një reflektim ndriçues mbi identitetin
e Kishës dhe mbi rolin e laikëve. Ta rikujtojmë këtë katekizëm:
“Nën Klementin
Romak, me që bashkësia e vëllezërve të Korintit qe tronditur thellë nga përçarjet,
Kisha e Romës i drejtoi një Letër, në të cilën prekeshin temat aktuale – atëherë e
sot – të identitetit të Kishës e të misionit të saj. Benedikti XVI citon fjalët e
Shën Ireneut, për të nënvizuar sa e rëndësishme ishte kjo ndërhyrje e Papës Klementi.
Dokumenti i nxiste besimtarët të ishin të përvujtë e ta donin njëri-tjetrin me dashuri
vëllazërore. Madje në Letër ndeshim për herë të parë fjalën ‘laik’, apo ‘shekullar’,
që në letërsinë e krishterë do të thotë ‘anëtar i popullit të Zotit’. Në këtë letër
- vijon Benedikti XVI - Shën Klementi shpjegon se në Kishë të gjithë, të bashkuar
në mënyrë të pandashme, janë gjymtyrë të njëri-tjetrit: “Dallimi ndërmjet
laikut e hjerarkisë nuk do të thotë kurrsesi kundërvënie, është thjesht lidhje organike
e një trupi, e një organizmi, me funksione të ndryshme. Kisha nuk është vend pështjellimesh
e anarkie, ku kushdo mund të bëjë si të dojë e kur të dojë: secili në këtë organizëm
ushtron detyrën e tij, me një strukturë të mirorganizuar, sipas thirrjes që ka marrë”.
Para së gjithash – u shkruan Klementi korintianëve, në përpjekjen për
t’i pajtuar – është kumtimi i gëzueshëm i hirit, që shëlbon. Ky kumtim e mbush me
gëzim jetën tonë e i jep siguri veprimtarisë sonë: Zoti na paraprin përherë me mirësinë
e tij e mirësia e Zotit është gjithnjë shumë më e madhe se të gjitha mëkatet tona.
Por ne duhet të impenjohemi në mënyrë koherente me dhuratën, që kemi marrë e t’i përgjigjemi
kumtimit të shëlbimit, duke ecur me fisnikëri e guxim në rrugën e pendimit, shkruan
Shën Klementi, duke nënvizuar edhe idealin e tij për Kishën, mbledhur nga i vetmi
Shpirt i hirit, që i jep frymë gjymtyrëve të ndryshme të Krishtit. Klementi –
na kujton Benedikti XVI – shpjegon qartë doktrinën e vazhdimësisë apostolike, duke
nënvizuar se normat që e rregullojnë, burojnë nga vetë Zoti. Gjithçka vjen nga vullneti
i Zotit – shkruan Shën Klementi. E këtu - pohon Benedikti XVI - theksohet me forcë
se Kisha ka strukturë sakramentore e jo strukturë politike: “Kisha mbi të
gjitha është dhuratë e Hyjit e jo krijesë e jona, prandaj kjo strukturë sakramentore
nuk garanton vetëm rendin e zakonshëm, por edhe përparësinë e dhuratës së Zotit,
për të cilën kemi nevojë të gjithë”. E Klementi – na kujton akoma Papa
- e përfundon Letrën e tij me një lutje të frymëzuar, lutja më e lashtë, pas teksteve
të Besëlidhjes së Re – për institucionet politike, menjëherë pas persekutimit të të
krishterëve. Na rikujton, kështu, se duhet të lutemi për ata që na persekutojnë, ashtu
si bëri Jezusi mbi Kryq. Kjo lutje – nënvizon Papa – i prin në rrjedhë shekujsh
sjelljes së të krishterëve ndaj politikës e shtetit: “Duke u lutur për autoritetet,
Klementi njeh ligjshmërinë e institucioneve politike e njëkohësisht shqetësohet për
to, sepse dëshiron që këto institucione ta ushtrojnë pushtetin që u ka dhënë Zoti
në paqe e përdëllim (61,2).Qesari nuk është gjithçka. Mbi të
lartohet një sovranitet tjetër, zanafilla dhe thelbi i të cilit nuk janë të kësaj
bote, por të botës qiellore: është kjo e Vërteta e Zotit, që kërkon edhe nga shteti
të drejtën të dëgjohet”.