Botohen dy biografi të reja kushtuar të Lumes Nënë Terezë.
(23.11.2009 RV)Të enjten e kaluar, më 19 nëntor 2009, në kulmin e Festivalit
VIII të Muzikës Kishtare, në Bazilikën e Vatikanit u kremtua një Meshë solemne. I
kushtohej meshtarëve, ashtu si edhe vetë Festivali, që u zhvillua pikërisht në zemër
të Vitit Meshtarak, shpallur nga Benedikti XVI. Kardinali Anxhelo Komastri, që
kryesoi Meshën, e nisi Homelinë duke kujtuar të Lumen shqiptare, Gonxhe Bojaxhiu:
“Disa vjet më parë – theksoi - mbeta tejet i prekur nga disa pohime të Nënë Terezës.
Ajo, me bindje të thellë, më tha: ‘Problemi i vetëm i vërtetë i Kishës janë meshtarët.
A e dini pse? Sepse meshtarët janë e vetmja pasuri e madhe e Kishës. Kisha është
eukaristike e Eukaristinë mund të na e japin vetëm meshtarët”. E pastaj, si kujtoi
edhe Shën Gjon Vianein, figurë qëndrore e Vitit Meshtarak citoi, jo pa shqetësim
të thellë, fjalët e famullitarit të Arsit, në përkim të plotë me ato të Nënë Terezës:
“Lëreni një famulli për njëzet vjet pa prift, e keni për të parë si arrihet në adhurimin
e kafshëve” . E kjo po ndodh sot - përfundoi Kardinali – bota po mbushet përplot
me idhuj, me gënjeshtra, me mashtrime, pikërisht sepse mungojnë ose janë të pakët,
shërbëtorët besnikë të Ungjillit”. Një lajm të gëzueshëm për Nënën
tonë Terezë e lexojmë në numrin e fundit të revistës italiane ‘Familja e Krishterë”
(n. 47, 22 nëntor 2009). Titullohet “Hiri, që i shndërron jetët tona të
përhumbura: dy biografi të reja na ndihmojnë të rizbulojmë aktualitetin e Nënë Terezës”,
shkruar nga Franka Xambonini. Duke pasur parasysh numrin e jashtëzakonshëm
të librave e të shkrimeve të tjera të të gjitha natyrave, kushtuar Nënë Terezës, autorja,
me të drejtë, vëren: “A është e mundur të ketë mbetur akoma diçka pa u thënë për Nënë
Terezën?”. Duket se po. E dëshmon këtë interesimi i vazhdueshëm për figurën madhore
të së Lumes Terezë, gurrë e pashterrshme frymëzimi për njerëz nga të katër anët e
botës, që vijojnë të ndjekin shembullin e saj e të shkruajnë për të.Dy librat e rinj
titullohen “Nënë Tereza: gjithçka nisi në tokën time”, shkruar nga Kristina
Sikardi, botuar nga San Paolo dhe “Misteri i Nënë Terezës”, me autor Jozef
Langford, botuar nga Rizzoli.