Shqipëri: Ministri i Brendshëm i Italisë, Maroni do të mbështesë heqjen e vizave për
qytetarët e Shqipërinë në BE.
(18.11.2009 RV)Impenjimi i ministrit të brendshëm të Italisë, Roberto Maronit
për liberalizimin e vizave për qytetarët e Shqipërisë brenda vendeve anëtare të BE-së.
Në takimin e sotëm në Tiranë me homologun shqiptar Lulzim Basha, Maroni ka siguruar
se “Italia do të mbështesë” këtë çështje në mbledhjen e ardhshme të ministrave të
brendshëm të Bashkimit Evropian dhe uroi që liberalizimi i vizave të realizohet “që
nga mesi i vitit 2010”. Ministri i Brendshëm i Italisë Maroni vlerësoi Shqipërinë
si një partner shumë të rëndësishëm strategjik në terrenin e sigurisë, ndaj beson
se bashkëpunimi do të jetë i dobishëm në termat e shkëmbimit të informacionit, të
njerëzve dhe të të gjitha elementeve të tjerë."Për këtë motiv Italia mbështet përpjekjet
e qeverisë shqiptare për të realizuar kushtet për një hyrje të shpejtë në Unionin
Europian, si dhe mbështesim kërkesën për liberalizimin e vizave", vazhdoi më tej ministri
Maroni. Vizita e ministrit italian në Shqipëri u realizua pas vendimit të BE
që e deklaroi pranimin e kërkesës së Shqipërisë për aderimin e plotë në Bashkimin
Evropian, pa caktuar një datë të saktë për fillimin e negociatave. Italia, tha Maroni,
mbështet impenjimin e qeverisë shqiptare në përmbushjen e të gjitha kushteve për një
hyrje të shpjet në BE. Nga ana e tij ministri shqiptar Basha prezantoi punën
e bërë nga qeveria e Tiranës në luftën kundër trafikut dhe krimit të organizuar si
dhe vlerësoi numrin e lartë të prodhimit të pasaportave biometrike sipas standarteve
evropiane.
Qeveria shqiptare do të realizojë të gjitha kushtet e vendosura
nga Komisioni Evropian në mënyrë që qytetarët shqiptarë të mund të lëvizin lirshëm,
u shpreh të mërkurën Kryeministri Berisha gjatë takimit me ministrin e Brendshëm të
Italisë, zotin Roberto Maroni. Zyra e shtypit e Kryeministrisë bëri të
ditur se Kryeministri Berisha shprehu në këtë takim mirënjohjen për ndihmën dhe solidaritetin
e madh te qeverise dhe popullit italian në të gjitha drejtimet, duke i vlerësuar
marrëdhëniet dhe bashkëpunimi me qeverinë italiane të një rëndësie të jashtëzakonshme.
Duke folur për liberalizimin e vizave, Kryeministri Berisha tha se "Ai dhe
qeveria e tij e shohin integrimin dhe liberalizimin e vizave si një proces të bazuar
në performancë dhe në të mirë të qytetarëve të vendit". Kreu i qeverisë u
shpreh se "Italia i njeh përpjekjet dhe arritjet e Shqipërisë në luftën kundër krimit
të organizuar dhe trafiqeve dhe si e tillë mund të jetë avokati më i mirë i Shqipërisë
në proceset integruese". Nga ana e tij, Ministri i Brendshëm italian, Roberto
Maroni, shprehu nivelin e shkëlqyer të bashkëpunimit të fushën e sigurisë dhe luftës
kundër krimit të organizuar midis dy vendeve. Duke folur për procesin e liberalizimit
të vizave, ministri Maroni shprehu besimin se "Këshilli i Ministrave të Jashtëm të
BE-së do t'i hapë rrugë liberalizimit të vizave në mesin e vitit të ardhshëm". Sipas
tij, integrimi i vendeve të Ballkanit në Bashkimin Evropian është një proces i natyrshëm.
Kryeministri Berisha e njohu ministrin Maroni me masat qe ka ndërmarrë qeveria
shqiptare për të goditur krimin e organizuar, si dhe vuri në dukje suksesin e luftës
kundër kultivimit dhe trafikimit të lëndëve narkotike. Në këtë kontekst, Kryeministri
Berisha përmendi miratimin së shpejti në parlament të ndryshimeve në ligjin për masat
kundër krimit të organizuar, që do të bëjë të mundur goditjen dhe parandalimin e tij
me anë të masave shtrënguese dhe sekuestrimit të pasurive të vëna në mënyrë të jashtëligjshme.
Ministri Maroni mbështeti qëndrimin e Kryeministrit Berisha për nevojën e
rritjes dhe forcimit të bashkëpunimit të policive dhe agjencive të të dy vendeve në
goditjen e krimit të organizuar, pastrimit të parave dhe në veçanti koordinimit në
masat shtrënguese kundër pasurisë të fituar në mënyrë kriminale. Në këtë kuadër, zoti
Maroni u shpreh se mënyra me efikase e luftës kundër mafies është konfiskimi i te
ardhurave kriminale.