Benedikti XVI Fao-s: të njohësh vlerën e mbinatyrshme të çdo njeriu, është hapi i
parë për zhdukjen e urisë e të mjerimit.
(16.11.2009 RV)Planeti ka ushqim të mjaftueshëm për të gjithë, duhet të bashkojmë
forcat për të fituar mbi urinë! Është thirrja e fuqishme e Benediktit XVI, drejtuar
sot paradite nga Pallati i Fao-s në Romë, në sesionin e hapjes së Takimit botëror
të rangut të lartë për Sigurinë Ushqimore. Ati i Shenjtë nënvizoi se për ta mundur
urinë, duhet njohur vlera e mbinatyrshme e njeriut. Fjalimi historik i Papës u
mbajt në praninë e shumë personaliteteve të larta shtetërore, ardhur nga mbarë bota.
Ndërmjet tyre, sekretari i përgjithshëm i OKB, Ban Ki-mun dhe drejtori i përgjithshëm
i Fao-s, Zhak Diuf, që i drejtoi një përshëndetje të posaçme Benediktit XVI: “ La
faim est le signe le plus cruel et le plus concret de la pauvreté... Uria
është caku më mizor e më konkret i varfërisë. Nuk është e mundur më të pranohen kamja
e shpërdorimi, kur drama e urisë merr përmasa gjithnjë më të mëdha”. Papa
ripohoi impenjimin e Kishës katolike për t’i mbështetur me fjalë, me vepra e me solidaritet,
të gjitha përpjekjet, që kanë për qëllim ta zhdukin urinë: “L’Église ne prétend
pas interférer dans les choix politiques... Kisha – siguroi
Ati i Shenjtë – nuk pretendon të ndërhyjë në rrugëzgjidhjet politike; ajo,
plot respekt për njohuritë dhe rezultatet e shkencave, si dhe për rrugët e përcaktuara
nga arsyeja, kur ndriçohen nga vlerat e vërteta njerëzore, bashkon forcat me të gjithë
njerëzit, që përpiqen për zhdukjen e urisë”. Kemi nevojë për solidaritet
të frymëzuar nga dashuria – tha Papa – gjë që duhet bërë pa vonesa e pa kompromise.
Ky solidaritet – vërejti në vijim Benedikti XVI – i beson teknikës, ligjeve e institucioneve,
por pa e përjashtuar përmasën fetare, me forcën e saj të pushtetshme shpirtërore
e me kujdesin për zhvillimin e gjithanshëm të njeriut: “Reconnaître la valeur
transcendante de tout homme... Ta njohësh vlerën e mbinatyrshme të çdo
burri e të çdo gruaje – vërejti Benedikti XVI - mbetet hapi i parë për të favorizuar
kthesën e zemrës, që mund të mbështesë impenjimin për çrrënjosjen e mjerimit, të urisë
e të varfërisë, në të gjitha format e saj: “Dans ce contexte, il est
aussi nécessaire de contester... Në rrethana të tilla – reflektoi
Ati i Shenjtë – është e nevojshme të kundërshtohet edhe përdorimi i disa
formave të subvencionit, që e trondisin rëndë sektorin bujqësor; këmbëngulja e gabuar
për përdorimin e modeleve ushqimore, që vënë në plan të parë konsumin, pa llogaritur
perspektivat me rreze më të gjërë e, posaçërisht, egoizmi, që i hap spekullimit rrugët
për të hyrë deri në tregjet e drithërave; prej këndej, ushqimi konsiderohet si masë
e të gjitha mallrave të tjera”. Në vijim Papa foli për bashkëpunimin ndërkombëtar
që, saktësoi, duhet të përkojë me parimin e ndihmës. E kjo, sepse zhvillimi i gjithanshëm
njerëzor ka nevojë për rrugëzgjidhje plot përgjegjësi nga ana e të gjithëve e kërkon
një solidaritet të tillë, që nuk i konsideron ndihmën ose emergjencën si mjete për
t'i vënë pasuritë në dispozicion të grupeve elitare, të cilat përfitojnë të parat
prej tyre. Bashkësia ndërkombëtare duhet ta ndjejë përgjegjësinë e saj të përbashkët,
kur është fjala për zhvillimin e vendeve më të varfëra: “Au sein de ce contexte
de responsabilité se situe le droit... Brenda këtij konteksti – pohoi
Papa – përfshihet edhe e drejta e secilit vend për të përcaktuar modelin
e vet ekonomik, duke parashikuar mënyrat, të cilat garantojnë lirinë e rrugëve që
duhen zgjedhur e të qëllimeve që duhen arritur. Në një perspektivë të tillë, bashkëpunimi
duhet të bëhet mjet i frytshëm, i çliruar nga pengesat e interesat, që mund të thithin
një pjesë të mirë të burimeve të caktuara për zhvillimin. Ka rëndësi të nënvizohet
se rruga solidare për zhvillimin e vendeve të varfëra, mund të bëhet rrugë që çon
edhe në zgjidhjen e krizës globale, në vijim e sipër”. Në situatën e sotme
– vijoi Papa – vërejmë ende një nivel zhvillimi të pabarabartë në gjirin e kombeve
e ndërmjet tyre. E kjo e thekson edhe më shumë kontrastin ndërmjet pasurisë e varfërisë.
Nga ana tjetër - vërejti Benedikti XVI – ekziston rreziku që uria të shikohet si fenomen
strukturor, si pjesë përbërëse e realiteteve shoqëroro-politike të vendeve të ligështa,
si objekt pakënaqësie ose indiference: “Il n’en est pas ainsi, et il ne doit
pas en être ainsi... Nuk është kështu, e nuk duhet të jetë kështu!
– tha Papa. - Për ta luftuar e për ta mundur urinë, është e rëndësishme
t’i ripërcaktojmë konceptet e parimet, që janë zbatuar deri tani në marrëdhëniet ndërkombëtare”. Ç’gjë
mund ta orientojë vëmendjen dhe sjelljen e Shteteve ndaj nevojave që kanë të varfërit?
- pyeti Papa. Përgjigjja – tha Ati i Shenjtë – nuk duhet kërkuar në natyrën operative
të bashkëpunimit, por në parimet, që duhet ta frymëzojnë atë: vetëm në se pranohet
që të gjithë i përkasin familjes universale njerëzore, mund t’i kërkohet çdo populli
e, prej këndej, edhe çdo vendi, të jetë solidar, duke favorizuar ndarjen e përbashkët
të pasurive, bazuar mbi dashurinë. Në vijim Papa pohoi me forcë: “Është e vërtetë
se solidariteti i frymëzuar nga dashuria i kalon caqet e drejtësisë, por nuk është
kurrë pa drejtësi, sepse: “Nuk mund t’i jap tjetrit gjënë time, në se në radhë të
parë nuk i jap atë, që i takon sipas drejtësisë”: “Si on vise l’élimination
de la faim, l’action internationale... Në se synohet vërtetë të zhduket
uria – pohoi Papa - veprimtaria ndërkombëtare është e thirrur
jo vetëm të favorizojë zhvillimin ekonomik të drejtpeshuar e të qëndrueshëm, si dhe
stabilitetin politik, por edhe të kërkojë parametra të reja – së pari etike, e pastaj
juridike dhe ekonomike – që janë në gjendje të frymëzojnë veprimtari bashkëpunimi
për krijimin e lidhjeve të barabarta ndërmjet vendeve në shkallë të ndryshme zhvillimi”. Papa
ngriti zërin që tregu ndërkombëtar të jetë i hapur për prodhimet e zonave më të varfëra,
të cilat kështu mund të sigurojnë më shumë të ardhura, garanci e zhvillimit e prelud
i sigurisë ushqimore. Krahas ushqimit, Papa kujtoi edhe të drejtën themelore për
furnizimin me ujë, pa dallime e diskriminime, si dhe lidhjen e ngushtë ndërmjet zhvillimit
e mbrojtjes së ambientit, sfidë kjo e fundit, për sigurimin e një zhvillimi më të
harmonishëm, që respekton planet krijuese të Zotit e kështu është në gjendje ta shpëtojë
Planetin nga shumë rreziqe, ndërmjet të cilave theksoi fenomenin e ndryshimeve klimaterike: “Des
normes, des législations, des plans de développement et des... Por
normat, ligjshmëritë, planet e zhvillimit e investimet nuk mjaftojnë –
pohoi - sepse duhet ndryshuar stili personal e komunitar i jetesës, mënyra
e konsumit dhe e plotësimit të nevojave të ndryshme. Mbi të gjitha, është e nevojshme
të kujtojmë detyrën morale të dallimit të së mirës nga e keqja në veprimet njerëzore,
për të zbuluar kështu, lidhjet që bashkojnë njeriun me Hyjin”.