(14.11.2009 RV) Më 15 nëntor Kisha katolike kremton të dielën 33-të
të kohës gjatë vitit kishtar, e po sot me 15 nëntor kalendari Kishtar e përkujton
Shën Albertin e madh, ipeshkëv e doktor i kishës dhe Shën Jozef Pinjatelin, meshtar
jezuit. Na kujtojnë se Jezusi shëroi shumë të gërbulur, po vetëm njëri u kthye
ta falënderojë atë, që ka forcë të shërojë sëmundjet e korpit e të shpirtit. I krishteri
i vërtetë duhet ta pranojë çdo çast pushtetin e Zotit mbi jetën e tij e duhet të jetë
i vetëdijshëm se është Hyji ai, që na prin drejt të mirave të jetës së amshuar.
Duke
ndjekur liturgjinë e festës së Shën Margeritës së Skocisë e të Shën Gjeltrudes,
virgjër benediktine - të hënën me 16 nëntor , nuk mund të mos na lindë pyetja:
“Ç’është mbretëria e Zotit? Kur do të vijë?”. Këto pyetje i bëjmë edhe sot, siç i
bënin farizejtë në kohën e Jezusit. E pra Ai na fton të mos e ndjekim këtë logjikë
njerëzore e ta pranojmë pa kushte në jetën tonë të përditshme.
Ta humbasësh
jetën, për ta shpëtuar. Këtë mendim, në dukje kontradiktor, na kujton, të martën e
ardhshme me 17 nëntor, festa e Shën Elizabetës së Hungarisë, terciare françeskane.
E pra vetëm ai që do ta ketë dhuruar plotësisht jetën, do të shpërblehet në ditën
e mbramë. Ndërsa kush ia mbyll vëllezërve portat e zemrës, nuk është në gjendje ta
pranojë ardhjen e Zotit.
Të mërkurën me 18 nëntor do të kremtohet përvjetori
i shugurimit të Bazikës vatikanase (1626) dhe i Bazilikës ostiense (1854). Na
kujtojnë se lutja e vazhdueshme dhe bamirësia, janë dy cilësitë që e dallojnë të krishterin,
i cili sillet kështu sepse përpiqet t’i ngjajë Zotit. Duke jetuar me lutje e dashuri,
ecim të sigurtë në rrugët që çojnë drejt qiellit. Të enjten e ardhshme me 19
nëntor kalendari Kishtar përkujton festën e Shën Matildës virgjër e të Shën Abdisë
profet. Festa e tyre na kujton se Hyji i bën pjesëtarë të jetës së vet hyjnore
të gjithë ata që vdesin në bashkim me Të. Të premten me20 nëntor, kalendari
Kishtar do të kremtojë Shën Oktavin dhe Shën Gjelazin I, papë. Liturgjia e festës
së tyre na fton t’i shërbejmë gjithnjë Zotit, sepse shërbëtori besnik i Hyjit do të
ketë jetën e pasosur.
Në festën e Kushtimit të Zojës Mari, që do të
kremtohet të shtunën e ardhshme me 21 nëntor, Ungjilli na paraqet një nga mrekullitë
më të mëdha të Jezusit: shërimin e zemrës së Xakeut të pangopur me pasuri. Nuk duhet
harruar, prandaj, se mëshira e Zotit mund t’i prekë edhe njerëzit që duken të humbur.
Të
dielën e ardhshme me 22 nëntor do të kremtohet e diela e fundit e këtij viti liturgjik,
festa e Krishtit Mbret. E gjithnjë në këtë ditë përkujtohet edhe Shën Çeçilja,
virgjër e martire, që na kujton se nxënës i vërtetë i Krishtit nuk është ai që
e pret pasivisht kthimin e Zotit, por ai që bëhet shërbëtor i palodhur i mbretërisë
së qiellit.