“Kisha të jetë shenjë e ndritshme shprese për njerëzimin e Mijëvjeçarit të tretë”:
Benedikti XVI, në Bresha, kujton fjalët e Palit VI për Kishën “e varfër e të lirë”
e për marrëdhëniet e saj me botën.
(09.11.2009 RV)Dje dioqeza e Breshas ishte në festë. Kishte në gjirin e vet
Papën, që e vizitonte për herë të parë, tridhjetë vjet pas vdekjes së Palit VI e në
shenjë nderimi për Anxhelo Tadinin. Që në orët e para të mëngjesit, pa pyetur fare
për shiun, mijëra besimtarë kishin mbushur plot anët e rrugëve, ku do të kalonte Papa,
që arriti në orën 9. 30 në Botiçini Sera, ku u përshëndet nga autoritetet vendase.
“Duam Papën!”, brohorisnin fëmijët, ndërsa Ati i Shenjtë hynte në shenjtërore për
t’u lutur para relikeve të Tadinit, figurë që - i tha Benedikti XVI bashkësisë, duke
folur lirisht - na fton të gjithëve ta duam Hyjin e të punojmë për një botë vëllazërore,
në të cilën njeriu nuk jeton vetëm për vete, por edhe për të tjerët. Më pas Papa
u nis për në Bresha ku, gjatë Meshës, kujtoi Palin VI dhe dashurinë e tij për një
Kishë të fortë, me rrënjë në Jezu Krishtin e, prej këndej, shumë pranë njeriut, model
për dialogun me botën bashkëkohore.
“Ndërmjetëso, që Kisha
të jetë shenjë e ndritshme shprese për njerëzimin!”- iu lut Benedikti XVI Zojës së
Bekuar, duke kujtuar Palin VI. E ndiqnin 12 mijë besimtarë, mbledhur në Sheshin, kushtuar
Papës breshan. Edhe më të shumtë ata, që kishin mbushur dy anët e rrugëve të qendrës
së qytetit si dhe Sheshin Loxhia, ku Benedikti XVI u ndalua për t’u lutur, ashtu
siç kishte bërë edhe Gjon Pali II, para shtyllëzave, që të kujtojnë masakrën e vitit
1974. Më pas, Ati i Shenjtë arriti në Katedrale, i shoqëruar nga duartrokitje të stuhishme
e nga tingujt e himnit ‘Tu es Petrus” – ‘Ti je Pjetri!”, dhe nisi ritin, në bashkëkremtim
me klerin breshan.
Kisha - shpjegoi Papa gjatë homelisë – është një organizëm
shpirtëror konkret, që e shtrin në kohë e në hapësirë mblatën e birit të Hyjit: "Kisha,
e cila lind pambarimisht nga Eukaristia, është vijim i kësaj dhurate… Është Korpi
i Krishtit, që dhurohet plotësisht, Korp i thyer e i ndarë ndërmjet nesh, në bashkim
të përhershëm me vullnetin e Kreut të vet”. E kjo është Kisha, që deshi
Shërbëtori i Hyjit, Pali VI i cili, në prag të vdekjes, i drejtoi ftesën t’i kuptojë
nevojat e vërteta e të thella të njerëzimit e të vijojë ecjen, e varfër, domethënë
e lirë, e fortë e plot dashuri për Krishtin: “Kështu duhet të jetë bashkësia
kishtare, që të mund t’i flasë njerëzimit bashkëkohor. Gjovani Batista Montini, që
në vitet e meshtarisë, deri në ato të papnisë, i pati shumë për zemër takimin e
dialogun e Kishës me njerëzimin e kohës sonë. Ia kushtoi, prandaj, të gjitha energjitë,
shërbimit të një Kishe sa më të ngjashme me Zotin e vet, Jezu Krishtin, kështu që,
duke takuar Kishën, njeriu bashkëkohor të mund të takojë Atë, sepse pikërisht për
Të ka nevojë absolute”. Kjo - shpjegoi Papa – është edhe kërkesa kryesore
e Koncilit II të Vatikanit. Duke pasur parasysh Vitin Meshtarak, Benedikti XVI
u kujtoi, posaçërisht seminaristëve e meshtarëve të pranishëm, mësimin e Palit VI
mbi çelibatin, parë si dashuri virgjërore e Krishtit për Kishën, e më pas i nxiti
t’ia besojnë ardhmërinë e Kishës vetëm Jezu Krishtit, siç bënte Pali VI në vitet e
vështira ’60.
Figura e ndritur e Papës Montini ishte në qendër të vëmendjes
së Benediktit XVI edhe në lutjen e Engjëllit të Tënzot. Ati i Shenjtë theksoi
posaçërisht devocionin e Palit VI për Virgjërën Mari, së cilës ia pati kushtuar meshtarinë
e tij e të cilën e shpalli Nënë të Kishës. Pikërisht kësaj Nëne, Papa ia besoi popullin
lombard, para se të ndahej prej tij, duke i dhënë bekimin apostolik.