9 nëntor 1989: një hap i madh paqeje. 20 vjet nga rënia e Murit të Berlinit
(09.11.2009 RV)Me ceremoninë fetare ekumenike, të kremtuar në praninë e presidentit
federal Horst Kohler dhe të kancelares Angela Merkel, filloi sot paradite në Berlin,
në kishën e Gjetsemanit në lagjen Prenclojer Berg – qendër grumbullimi për rezistencën
kundër komunizmit në Gjermaninë Lindore – përkujtimi i 20 vjetorit të rënies së Murit
të Berlinit. Më pas, Angela Merkel shkoi në Kapelën e Pajtimit e pasdite, kapërceu
ish-kufirin ndërmjet dy Gjermanive, pikërisht në pikën ku berlinezët lindorë mundën
të kalonin për në perëndim, mbrëmjen e 9 nëntorit 1989. Në të gjitha aktivitetet morën
pjesë dy personazhe kyç të atyre viteve: ish-presidenti sovjetik, Mikhail Gorbaçov
dhe ish-kreu i sindikatave e ish-presidenti polak, Lek Valesa. Impresionuese “Festa
e Lirisë” ku ishin të ftuar të gjithë krerët evropiane e shumë politikanë. Kulmi u
arrit me shembjen e murit prej një mijë gurësh dominoje, 2,5 m të lartë, bërë nga
studentë e artistë gjermanë nga e gjithë bota. Para portës së Brandeburgut u përjetua
sërish atmosfera e 20 vjetëve më parë. Gjatë ceremonive u përkujtuan edhe 136 personat,
që u vranë, në përpjekjen për të kapërcyer murin nga viti 1961 deri më 1989. Mbi
këtë ngjarje historike, të dëgjojmë komentin e drejtorit tonë të përgjithshëm, atë
Federiko Lombardi, zëdhënës i Selisë së Shenjtë:.... “Kanë kaluar
20 vjet nga dita e paharrueshme e rënies së murit. Çfarë feste popullore në Berlin!
Sa habi e sa gëzim në të gjithë Evropën e në të gjithë botën, që shihte e rishihte
ato imazhe të pabesueshme! Për rreth 30 vjet, ata që ishin përpjekur ta kapërcenin
duke ikur drejt lirisë kishin rrezikuar jetën, dhjetra e dhjetra vetë kishin vdekur
para syve të tmerruar të dëshmitarëve të rastit. Besonim se burgu i madh i mbrojtur
nga ai mur – e më gjerë nga “muri i hekurt” simbolik, që ndante Evropën më dysh –
do të rezistonte akoma edhe për shumë vjet. Por, aspiratat e lirisë dhe
dobësitë e brendshme të regjimeve, të bazuara mbi një ideologji armike me Zotin e
me njeriun, kishin punuar thellë në popujt e Lindjes, duke përgatitur një shembje
epokale, e pashoqëruar – fakt ky fatlumë e i rrallë – nga derdhje të mëdha gjaku. Pa
dashur të thjeshtojmë një proces historik jashtëzakonisht të ndërlikuar, na vjen spontanisht
kujtimi i rolit të Papës Gjon Pali II, i udhëtimeve të tij në Poloni, e cila kishte
mbetur gjerësisht e besnikërisht katolike, dhe i pasojave të tyre në aspiratat e kërkesat
për liri të atij populli e të popujve fqinjë. Kur Papa i moshuar kalonte më në fund
nën Portën e Brandeburgut, jo vetëm Gjermania ishte bashkuar, por Evropa merrte frymë
me dy mushkëri, Lindje e Perëndim. Feja e krishterë kishte treguar se kish kontribuar
edhe një herë në bashkimin e në qytetërimin e kontinentit, duke kapërcyer provën e
tmerrshme të ateizmit shtetëror. Është mirë të kujtohet kjo gjë, sa herë ndokush ngul
këmbë për kufizimin e kësaj feje në fushën e ngushtë private. Por fatkeqësisht,
në botë u ndërtuan e po ndërtohen mure të tjera. Do të vazhdojmë të impenjohemi,
duke pritur që të festojmë më në fund, edhe padobinë e shembjen e tyre”.