Presidenti i Kazakistanit, në Vatikan, bisedon me Papën për paqen, krizën ekonomike
e dialogun ndërfetar.
(06.11.2009 RV)Sot paradite Benedikti XVI priti në audiencë presidentin e Republikës
së Kazakistanit, Nursulltan Nazarbajev i cili, më pas, u takua edhe me sekretarin
e Shtetit të Vatikanit, kardinalin Bertone si dhe me sekretarin për marrëdhëniet me
shtetet, imzot Dominik Mambertì. “Gjatë bisedimeve të përzemërta – njofton një
komunikatë e Sallës vatikanase të Shtypit – u prekën temat e krizës ekonomike, parë
në dritën e Enciklikës “Caritas in Veritate’, të dialogut ndërfetar e të promovimit
të paqes, në prag të fillimit të presidencës së Kazakistanit në OSBE. Në nivel dypalësh,
u kujtuan me kënaqësi, marrëdhëniet e mira ndërmjet Selisë së Shenjtë e Republikës
së Kazakistanit si edhe disa tematika, aktuale për jetën e vendit. U vu në dukje bashkëjetesa
paqësore ndërmjet besimtarëve të feve të ndryshme, duke uruar të luajnë një rol gjithnjë
më aktiv në jetën e kombit e në favor të së mirës së përbashkët.