Helmut Kohl: gjatë rënies së Murit të Berlinit, tanket sovjetike i ndaloi Gorbaçovi
(04.11.2009 RV)Vetëm pak ditë nga 20-vjetori i rënies së Murit të Berlinit,
në një numër të veçantë, revista italiane “Epoka” boton një shkrim të ish-kancelarit
gjerman Helmut Kohl, ku ai i njeh liderit të atëhershëm të Bashkimit Sovjetik, Gorbaçov,
meritën e shmangjes së gjakderdhjes. “Kujtoj akoma, madje shumë mirë, se sa ishte
i shqetësuar Gorbaçovi me rënien e Murit. Kishte frikë mos situata i shpëtonte nga
dora e më pyeti nëse ishte e vërtetë që një turmë e indinjuar po sulmonte strukturat
e Ushtrisë së Kuqe në Berlin”, shkruan lideri kristiano-demokrat. “Vetëm më vonë
mora vesh se ishte informuar keq qëllimisht, me një objektiv të mirëpërcaktuar: përkrahësit
e linjës së ashpër brenda rrethit të drejtuesve të Republikës Demokratike Gjermane,
sëbashku me figura kyçe të KGB-së në Moskë, donin të shkaktonin një ndërhyrje ushtarake
të trupave sovjetike të disllokuara në Gjermaninë Lindore”. Teksti i Kohlit është
marrë nga parathënia e librit “Die Mauer” (Muri), botuar në Gjermani nga editori Fakeltreger. “Në
atë rast – shkruan akoma Helmut Kohl – e sigurova Gorbaçovin se frika e tij ishte
pa bazë dhe se manifestimet po zhvilloheshin paqësisht. I besoi fjalës sime”, vazhdon
ish-kancelari gjerman. “Më vonë, mora vesh se i kishte telefonuar edhe Vili Brandtit,
i cili i kishte thënë të njëjtat gjëra. E kështu, ndryshe nga qershori 1953 (data
e revoltës së punëtorëve), në vitin 1989 tanket sovjetike mbetën në kazerma”.