Presidenti Shqipërisë Topi: para drejtësisë autorët që ushtruan dhënë ndaj gazetarit
Mero Baze
(03.11.2009 RV)Presidenti i Republikës së Shqipërisë, Bamir Topi dënoi sot
me ashpërsi, aktin vandal dhe dhunën e ushtruar ndaj gazetarit Mero Baze, si dhe kërkoi
nga të gjitha organet e shtetit të zbardhin pa vonesë ngjarjen dhe të venë përpara
drejtësisë autorët e vërtetë. Përmes një njoftimi për shtyp, Kreu i shtetit
shqiptar u bëri thirrje të gjithë aktorëve politikë në Shqipëri që të analizojnë me
shqetësim këtë akt duke u angazhuar realisht, dhe jo vetëm nëpërmjet deklaratave,
në krijimin dhe garantimin e lirisë dhe pavarësisë së medias. "Dhunimi dhe
presioni i drejtpërdrejtë apo i tërthortë ndaj medias dhe gazetarëve shqiptarëve është
një kthim mbrapa në demokracinë që të gjithë dëshirojmë të ndërtojmë", thuhet në deklaratën
për shtyp të Presidentit të Republikës. Edhe kryeministri e të gjithë liderët
e partive politike dhe të institucioneve tjera e kanë dënuar dhunën e ushtruar ndaj
gazetarit të njohur dhe botuesit të gazetës “Tema”, Mero Baze, mbrëmjen e kaluar nga
biznesmeni Rezart Taçi dhe truprojet e tij. Policia e Tiranës dha sot një
deklaratë për shtyp lidhur me incidentin e ndodhur mbrëmë në një lokal në zonën e
ish- bllokut në Tiranë, kur ndaj gazetarit Mero Baze është ushtruar dhunë fizike
nga disa persona. Sipas njoftimit zyrtar, gjatë orëve të vona të mbrëmshme,
specialistët e seksionit Kundër Krimeve ndaj Jetës dhe Shëndetit, kryen arrestimin
në flagrancë të shtetasve: Bledar Lilo, 28 - vjec, lindur në Ersekë dhe banues Tiranë,
me detyrë punonjës i kompanisë "Taçi Oil" dhe Irgen Selfo, 23 - vjec, lindur dhe
banues në Tiranë. Ndërkohë që, është bërë shpallja në kërkim policor për shtetasin
Rezart Taçi. Policia sqaroi se shtetasit e arrestuar dyshohen se në bashkëpunim
me shtetasin Rezart Taçi, 38 - vjec, lindur në Ersekë dhe banues në Tiranë, me detyrë
President i Kompanisë Taci Oil, në ambjentet e brendshme të një lokali në rrugën "Brigada
8" në Tiranë, kanë goditur me grushta gazetarin Mero Baze, 43 - vjeç, lindur në Tepelenë
e banues në Tiranë, me detyrë Drejtor i medias së shkruar "Tema". I dëmtuari
Mero Baze, u dërgua menjëherë në Spitalin Ushtarak Tiranë ku pasi mori mjekimet e
duhura u largua për në banesë. Më pas, shtetasi Mero Baze ka kryer një kallzim penal,
në ngarkim të shtetasve të lartëpërmendur, ku ka deklaruar se është fyer e goditur
për shkak të profesionit të tij si gazetar. Gjithnjë sipas njoftimit të Policisë
së Tiranës, në vendin e ngjarjes u kryen veprimet hetimore dhe proçeduriale, ndërkohë
që materialet do t'i kalojnë Prokurorisë së Rrerthit Gjyqësor Tiranë, për veprat penale
të "goditjes për shkak të detyrës e kryer në bashkëpunim, parashikuar nga nenet 237
dhe 25 të Kodit Penal. Nga ATSH-ja