(01.11.2009 RV)Sot Kisha katolike kremtoi Solemnitetin e Të gjithë Shenjtorëve.
Nesër, e Hënë, përkujtimi i gjithë besimtarëve të vdekur, na sjell
në mend fjalët plot shpresë të Shkrimit Shenjt: “Jam i sigurtë se do të sodis mirësinë
e Zotit në tokën e të gjallëve”. Kush beson në Krishtin e ka fituar që tani jetën
e pasosur, që do të realizohet plotësisht në ringjalljen përfundimtare.
Të
martën do të kremtohenShën Martini i Porres, rregulltar domenikan e Shën
Silvia, nëna e Shën Gregorit të Madh. Bashkojmë zërin me atë të Psalmistit në lutjen:
“Ma ruaj, o Zot, paqen e shpirtit”.
“Të ndjekësh Jezusin, do të thotë të heqësh
dorë nga gjithçka. Në se nuk arrin të bëhesh ashtu si duhet të jesh, do të thotë
se i ngjet kripës, që e ka humbur shijen. Na e kujton këtë festa e Shën Karl Borromeut,
kryeipeshkëv i Milanos e kardinal, që do të kremtohet të mërkurën.
Dy
shembëlltyrat e deles dhe monedhës së humbur, në liturgjinë e së enjtes, vënë në dukje
kujdesin e Zotit për secilin prej nesh. Na e kujtojnë, në ditën e festës së tyre,
të enjten, Shenjtorët Domnini, Teotimi e shokë, martirë.
Do të kremtohet
të premten Shën Leonardi vetmitar. Liturgjia e festës së tij na kujton se bijtë
e kësaj toke ia kushtojnë gjithë vëmendjen punëve të tyre të pandershme. Ndërsa bijtë
dritës e kalojnë jetën duke bërë mirë e duke punuar vetëm për ndërtimin e Mbretërisë
së Hyjit.
Të shtunën kalendari shënon emrat e Shën Baldit, të Shën
Prosdoçimit, ipeshkëv i parë i Padovës dhe të Shën Vilibrordos, ipeshkëv. Na kujtojnë
se pasuritë duhet t’i shërbejnë së mirës. Mjer kush bëhet skllav i tyre! Sepse vlerat
tona nuk përkojnë gjithnjë me ato të Zotit e, në se shkëputemi prej tij, mund të humbasim
thesarin më të çmuar: jetën e pasosur.
E diela e ardhshme është e 32-ta e kohës
së zakonshme gjatë vitit kishtar.