Papa gjatë lutjes së Engjëllit të Tënzot: Shenjtorët na ftojnë ta ndjekim Krishtin
me gëzim e pa komplekse. Ta jetojmë në dritën e krishterë Përkujtimin e të vdekurve.
(01.11.2009 RV)“Papa gjatë lutjes së Engjëllit të Tënzot dje në Sheshin e shën
Pjetrit në Vatikan tha se Shenjtorët na ftojnë ta ndjekim Krishtin me gëzim e pa komplekse
dhe i ftoi besimtarët ta jetojmë në dritën e krishterë Përkujtimin e të vdekurve. “Nuk jemi të vetëm! Jemi pjesë e një ‘shoqërie’ shpirtërore në të cilën mbretëron
një solidaritet i thellë”, tha Benedikti XVI duke kujtuar përmasën e “bukur e
ngushëlluese” të Bashkësisë së Shenjtërve në fjalimin drejtuar 40 mijë besimtarëve
të mbledhur në Sheshin e Shën Pjetrit në Vatikan për lutjen e Engjëllit të Tënzot.
“Ky realitet” - theksoi Papa duke komentuar festën liturgjike të 1 nëntorit, që njihet
me emrin e të Gjithë Shenjtërve - “i jep një tjetër përmasë tërë jetës sonë”. Ne
jemi pjesë e një shoqërie dhe bashkësie shpirtërore në të cilën mbretëron solidariteti
i thellë’: e mira e secilit në dobi të të gjithëve e, anasjelltas, lumturia e përbashkët
rrezatohen në çdonjërin personalisht”. Për Papën teolog bëhet fjalë për “një
mister të cilin në një farë mënyre mund ta përjetojmë e shijojmë qysh në këtë botë,
në familje, në miqësi e posaçërisht në bashkësinë shpirtërore të Kishës”. Benedikti
XVI dje gjatë lutjes së Engjëllit të Tënzot kujtoi edhe ” përkujtimin e përvitshëm
të të gjithë besimtarëve të vdekur” që Kisha e përkujtoi sot me 2 nëntor. “Dua t’u
bëj thirrje ta jetojmë për përkujtim sipas traditës së krishterë të vërtetë, do të
thotë në dritën që vjen nga Misteri i Pashkëve: “ Derisa vizitojmë varrezat,
të kujtojmë se atje, në varreza, pushon vetëm trupi i pajetë i të dashurve tanë në
pritje të ringjalljes përfundimtare!. Shpirtrat e tyre -përfundoi Papa duke cituar
Biblën - janë që tani ‘në duart e Zotit’. Prandaj, mënyra më e përshtatshme dhe efikase
për t’i nderuar të dashurit tanë të vdekur është të lutemi për ta, duke ofruar vepra
feje, shprese, dashurie e bamirësie”.