Ipeshkvijtë e SHBA: “Fëmijët meritojnë të krijohen, jo të sajohen”.
(01.11.2009 RV)Fëmijët meritojnë të krijohen, jo të sajohen. Kështu shkruajnë
ipeshkvijtë e SHBA në një dokument, i cili do të diskutohet në asamblenë e përgjithshme
të Baltimores, gjatë nëntorit. Agjensia ‘Catholic News Servis”, botoi disa fragmente
të Life-Giving Love in Age of Technology” – “Dashuria që jep jetë në epokën e teknologjisë”,
shkrim me 22 faqe, në gjurmët e dokumentit të botuar më 2006, me titull: “Dashuria
bashkëshortore dhe dhurata e jetës”. Teknoshkenca nuk mund ta zëvendësojë dashurinë
e prindërve – theksojnë prelatët. Çiftet që, jo pa dhimbje, ndodhen para problemeve
të papritura të shterpësisë, kanë disa mundësi për t’u bërë prindër. Sfida – shkruajnë
– është të diagnostikohen e t’i përballojnë këto probleme në mënyrë që trupat të mund
të funksionojnë si duhet, e kjo nuk krijon asnjë shqetësim moral, sepse është thjesht
mjekim, si të gjitha mjekimet që bën njeriu, për të rifituar shëndetin. Ipeshkvijtë,
pra, i pranojnë mjekimet hormonale, kirurgjinë riparuese, mjekimet kundër shterpësisë
mashkullore si dhe të gjitha mjekimet, që sigurojnë rikthimin e trupit në normalitet.
Po ashtu edhe planifikimin familjar, të bazuar mbi metoda natyrore, që fuqizojnë mundësitë
e zënies së fëmijës. Ndërsa nuk pranojnë në asnjë mënyrë dhurimin e vezoreve e
të spermës nga ana e “donatorëve”, të cilët shpesh paguhen për këtë shërbim, duke
u kthyer në ‘shitës’, për realizimin e një amësie surrogate.