Kryeministri Shqipërisë Berisha takon Kancelaren gjermane, Angela Merkel gjatë Samitit
të PPE, në Bruksel
(30.10.2009 RV)Kancelarja gjermane, Angela Merkel siguroi dje se "do të bëjë
të gjitha përpjekjet për zgjidhjen më të shpejtë të mundshme të problemit teknik që
ka të bëjë me konstituimin e parlamentit gjerman, në mënyrë që të mos pengohet shqyrtimi
i kërkesës së Shqipërisë për statusin e vendit kandidat në BE". Sipas zyrës
së shtypit pranë kryeministrisë, së Tiranës gjatë punimeve të Samitit të kryetarëve
të shteteve dhe qeverive të Partive Popullore Evropiane (EPP), në Bruksel, Kryeministri
Berisha zhvilloi një takim edhe me Kancelaren gjermane, Angela Merkel. "Gjykata
Kushtetuese gjermane ka vendosur që t'a konstituojë Parlamentin, para çdo vendimi
që ka të bëjë më Bashkimin Evropian", tha Kryeministri Berisha. Duke vlerësuar
se fitorja e zgjedhjeve nga Kancelarja Merkel është historike për mbarë Evropën, Kreu
i ekzekutivit të Tiranës informoi Kancelaren se "Shqipëria është në pritje të konstituimit
të parlamentit gjerman". Sipas tij "Presidenca suedeze po pret të ketë dritën jeshile
nga qeveria gjermane, në mënyrë që të diskutojë në Këshill, statusin e vendit kandidat
për Shqipërinë, pasi vendet e tjera nuk kanë ndonjë rezervë". "Kancelarja
Merkel më informoi se të mërkurën ishte mbledhur Parlamenti dhe në ditët apo javët
në vazhdim do të vazhdojë konstituimi. Ajo më siguroi se do të bëjnë çdo gjë për t'a
realizuar këtë në kohën më të shkurtër të mundshme", tha Kryeministri Berisha, në
një prononcim për mediat në Bruksel. Nga ATSH-ja