Benedikti XVI ambasadores së re të Panamasë: Progresi i vërtetë nuk varet vetëm nga
zhvillimi ekonomik, por edhe nga ai moral e shpirtëror.
(30.10.2009 RV)Bashkëpunimi ndërmjet
Shtetit e Kishës në promovimin e së mirës së përbashkët dhe koncepti i progresit
të vërtetë të shoqërisë, ishin temat kryesore, që preku Papa, në fjalimin drejtuar
sot paradite ambasadores së re të Panamasë pranë Selisë së Shenjtë, zonjës Delia Cárdenas
Christie, që u prit në Vatikan për paraqitjen e letrave kredenciale. Roli i Kishës,
për arsye të misionit të saj, nuk mund të ngatërrohet me atë të Shtetit, e as të njëjtësohet
me programe politike. Kisha, që vepron në një mjedis me natyrë fetare e shpirtërore,
përpiqet për promovimin e dinjitetit të njeriut dhe për mbrojtjen e të drejtave të
tij themelore. Këtë pohoi Benedikti XVI, duke shprehur, në vijim, kënaqësinë për marëdhëniet
e mira ndërmjet Selisë së Shenjtë e Panamasë e duke ripohuar konceptin e laicitetit
të shëndetshëm, i cili bazohet mbi respektin reciprok të këtyre dy mjediseve, që dallohen
njëri nga tjetri. Por ky dallim – sqaroi Papa - nuk hamendëson indiferencën ose mosnjohjen
e anasjelltë sepse, ndonëse me cilësi të ndryshme, Kisha e Shteti punojnë për të mirën
e përbashkët të qytetarëve. Në këtë kontekst, Papa i ftoi katolikët e Panamasë
të punojnë për thellimin e barazisë shoqërore, ekonomike e kulturore, duke i kapërcyer
interesat egoiste e duke i forcuar më tej institucionet demokratike. Lidhur me këtë
– shtoi Benedikti XVI – nuk duhen kursyer përpjekjet për promovimin e një sistemi
gjyqësor të pavarur e të aftë, gjë që do të ishte ndihmesë e çmuar për zhvillimin
e një shoqërie të drejtë e vëllazërore, në të cilën askush nuk duhet ta ndjejë veten
të harruar a të dënuar të bjerë pre e dhunës dhe e braktisjes. Benedikti XVI kujtoi,
më pas, impenjimin e Kishës për të varfërit, të burgosurit, emigrantët, për mbrojtjen
e jetës, nga zënia në vdekjen e natyrshme dhe të familjes së bazuar mbi martesën e
një burri me një grua e, jo më pak, pastaj, luftën e Kishës kundër korrupsionit.Progresi
i një shoqërie – tha në përfundim Papa – nuk varet vetëm nga zhvillimi ekonomik e
teknologjik – por nga bashkëprania e përmasës etike e shpirtërore, që bëhet edhe
më e theksuar kur vihet në jetë nga njerëz me shpirt të drejtë, me sjellje të paqortueshme
e me vullnet të hekurt, që i kushtohen plotësisht së mirës së përbashkët.