Në Moskë nderohen viktimat e spastrimeve staliniane.
(29.10.2009 RV)Me dhjetra vetë
u mblodhën sot paradite në Lubianka, në Moskë, për t’u bërë homazh viktimave të spastrimeve
staliniane, në veçanti personave të pushkatuar gjatë spatrimeve të mëdha të viteve
1937-1938. Organizata joqeveritare ruse “Memorial”, e cila organizoi këtë ngjarje
përkujtimore, e kishte zgjedhur sheshin Lubianka për vlerën simbolike që ai ka: këtu
gjendeshin zyrat e policisë sekrete sovjetike. Pikërisht në këtë shesh është vendosur,
si monument, një gur që është sjellë nga ishujt Sollovki që gjenden vetëm 160 km larg
Polit të Veriut e ku dikur kishte një kamp përqendrimi sovjetik. Manifestuesit
lexuan në rend alfabetik emrat, moshën dhe profesionin e viktimave të pushkatimeve
të organizuara gjatë spastrimeve të mëdha të Stalinit. “Im atë është arrestuar në
vitin 1938 dhe është pushkatuar tre muaj më vonë, sigurisht me akuzën e spiunazhit,
sikurse edhe të gjithë të tjerët” - tregoi për të pranishmit Valentina Dygas, e cila
shtoi se nuk e ka marrë kurr vesh motivin e vërtetë të arrestimit. Në këtë manifestim
morën pjesë edhe mësues e nxënës shkollash: “Detyra e përkujtimit është një vepër
me karakter qytetar dhe është me rëndësi për fëmijët” thanë ata.