Imzot Miliore denoncon: të krishterat janë bashkësitë më të diskriminuara në botë.
(28.10.2009 RV)Liria fetare vijon
të dhunohet në shumë vende të botës: këtë denoncoi imzot Çelestino Miliore, vëzhgues
i përhershëm i Selisë së Shenjtë pranë Kombeve të Bashkuara, duke folur në Asamblenë
e Përgjithshme të OKB-së, që vijon në Pallatin e Qelqit në Nju Jork.. Në kundërshtim
të plotë me atë, që shpallet vazhdimisht nga bashkësia ndërkombëtare e që përcaktohet
në mjetet ligjore ndërkombëtare e në Kushtetutat e shumë shteteve, e drejta e lirisë
fetare vijon të shkelet e të dhunohet vazhdimisht – theksoi ipeshkvi Miliore. Nuk
ka fe në globin tokësor, që të jetë plotësisht e lirë nga çdo diskriminim. Shprehjet
e intolerancës fetare duken në forma nga më të ndryshmet. Të panumërta janë rastet,
të cilat paraqiten para Gjykatave dhe organizmave, që merren me të drejtat e njeriut.
E në se intoleranca fetare në botë rritet, duhet sqaruar se të krishterët janë grupi
fetar më i sulmuar – theksoi përfaqësuesi i Vatikanit – aq sa numri i të krishterëve,
që pësojnë diskriminime në planin ligjor ose kulturor, arrin në 200 milionë vetë. Ipeshkvi
Miliore kujtoi sulmet e përsëritura, këto muaj, kundër të krishterëve në disa nga
vendet aziatike, sidomos në Lindjen e Mesme, kundër bashkësive të krishtera, me pasojë
vrasjen e plagosjen e shumë njerëzve, djegien e kishave e të shtëpive. Veprime këto
– sqaroi prelati - të kryera nga fanatikët, si përgjigje ndaj akuzave bërë individëve
të cilët – sipas ligjeve kundër blasfemisë – konsiderohen si njerëz që nuk e respektojnë
fenë e të tjerëve. E në këto rrethana, Selia e Shenjtë e mbështet premtimin e qeverisë
pakistaneze që t’i rishikojë këto ligje, të cilat u krijojnë ekstremistëve shumë lehtësi
për t’i persekutuar lirisht ata, që zgjedhin një traditë tjetër fetare. Ligje, këto,
që kanë favorizuar padrejtësi, dhunë sektare e dhunë ndërmjet feve. Qeveritë – nënvizoi
përfaqësuesi i Vatikanit – duhet t’i shfuqizojnë këto ligje, të cilat shërbejnë si
mjete për të mbështetur shpërdorimet. Po kështu, të gjitha shtetet duhet të heqin
dorë nga hartimi i ligjeve, që e kufizojnë lirinë e shprehjes, gjë që çon në kufizimin
e lirisë fetare deri në atë masë, sa autoritetet të shuajnë zërat disidente, t’u mbyllin
gojën, sidomos, pakicave etnike e fetare. Ndërsa liria e vërtetë e fjalës mund të
shërbejë për edukimin e respektit ndërmjet popujve e të krijojë mundësitë për t’i
denoncuar shkeljet si intoleranca fetare ose racizmi, duke promovuar dinjitetin e
barabartë ndërmjet të gjithë njerëzve. Prandaj është e detyrueshme – përfundoi prelati
– që popujt me fe të ndryshme të punojnë së bashku për thellimin e mirëkuptimit të
anasjelltë. Por për ta arritur këtë, duhet një ndryshim i vërtetë i mendjeve e i zemrave.