(26.10.2009 RV)Pas tragjedisë së
përjetuar dje në Bagdad, ku atentati i dyfishtë në “zonën e gjelbërt” të kryeqytetit
shkaktoi 160 viktima e rreth 500 të plagosur, sot në Irak ishte ditë zie. Paradite
u kremtuan funeralet e viktimave, ku u hodhën parrulla kundër kryeministrit Nuri Al
Maliki, të cilit popullsia i kërkoi më tepër siguri. Nga ana e tij, presidenti irakian
Zhalal Talabani thirri sot një mbledhje pikërisht mbi temën e sigurisë. Mbi gjendjen
në vendin e Gjirit Persik të dëgjojmë të dërguarin e veçantë të gazetës italiane
“Sole 24 ore”, Alberto Negri: Ky episod i përgjakshëm nënvizon këtë situatë:
Iraku mund të jetë çdo gjë, por jo problem i zgjidhur e vend i qëndrueshëm. Sigurisht,
e kemi kthyer kokën nga ndonjë vend tjetër, nga Afganistani, Irani, por Iraku mbetet
akoma problem për vetveten e për krejt bashkësinë ndërkombëtare. Megjithëse në terren
ndodhen akoma 120 mijë ushtarë amerikanë, pjesa më e madhe u tërhoq në qershor nga
qytetet. Kjo gjendje, pra ajo e një shteti që vazhdon të përçahet nga ndarje etnike
e sektare, nuk ka të bëjë vetëm me Irakun, por edhe me shumë vende të zonës, nga Libani
te Jemeni, edhe ky i shkatërruar nga një lloj lufte civile që mund të bëhet problem
në të ardhmen edhe për vende shumëetnike si Irani. Prandaj, problemi i botës arabe
e myslimane, që akoma nuk ka gjetur qëndrueshmërinë dhe strukturën e vet shtetërore,
shtrihet deri në Afganistan.