Gati dokumenti i ri baritor për komunikimet shoqërore. Boca e parë u paraqit në Asamblenë
plenare të Këshillit Papnor.
(26.10.2009 RV)Filluan në Vatikan
punimet e Asamblesë plenare të Këshillit Papnor për Komunikimet shoqërore kushtuar
studimit të teknologjive të reja e të botës digjitale.Kisha pra është duke studiuar
Udhëzimet e reja Baritore në fushën e komunikimeve shoqërore, që do të zëvendësojë
ato të dokumentit Aetatis Novae, botuar më 1992. Në hapjen e punimeve
të Asamblesë, presidenti i Këshillit Papnor për Komunikimet Shoqërore, imzot Klaudio
Maria Çelli, vuri në pah prioritetin baritor në fushën e mediave: atë të formimit
në mjetet e komunikimeve shoqërore, në të gjitha nivelet e hierarkisë dhe paraqiti
bocën e parë të dokumentit te ri të Keshillit Papnor mbi komunikimet shoqërore. Zhvillimi
i teknologjisë së mediave, e me të edhe zhvillimi i përmbajtjeve që teknologjia nxit
apo krijon, i kërkojnë sot Kishës një azhurnim që tashmë nuk mund të shtyhet e as
të lihen jashtë programeve baritore, që ende janë të lidhura me Udhëzimet Baritore
të dokumentit Aetatis Novae, të cilin Këshilli Papnor i Komunikimeve Shoqërore e pati
nënshkruar para 17 vjetësh nën udhëheqjen e presidentit të asaj kohe, imzot Gjon Folej.
Kisha duhet të ketë sot para sysh “situatën aktuale në fushën e mediave”, sepse
ajo gjendet para sfidës që shkon nga dialogu me “kulturën digjitale”, deri te ballafaqimi
me realitetet ku mediat nuk kanë një mbizotërim dhe epërsi në kontekstin shoqëroro-ekonomik,
e edhe aty ku për shembull shtypi i shkruar akoma luan një rol të dorës së parë në
komunikimet shoqërore. Më tutje imzot Çelli duke folur për interesimin e Kishës ndaj
mediave, nënvizoi rëndësinë që Kisha duhet ta ketë ndaj botës akademike e ndaj radiove
katolike, e sidomos rëndësinë për formimin në fushën e komunikimeve shoqërore të tërë
klerin e të botës rregulltare dhe asaj fetare. “Më duket se ka ardhur momentin
- përfundoi imzot Çelli - ta drejtojmë vështrimin tonë drejt shtypit katolikë e botës
së Internetit”, duke vlerësuar përvojat që janë mbledhur deri më tani në shumë dioqeza
në dy sektorët: shtyp e internet, e kështu të shkojmë drejt së ardhmes. Sfida e madhe
që Kisha duhet të përballojë sot nuk është ajo e pajisjes me mjetet më të fuqishme
të transmetimit, por të jetë e aftë të dialogë me këto kultura të reja. Edhe në
botën e teknologjive të reja, Kisha e nxënësit e Jezusit mund ta kenë tendën e tyre,
tendën e Jezusit, sepse vëmendja duhet t’i drejtohet burrave e grave dhe të gjithë
atyre që kalojnë nëpër rrugët e botës e të gjithëve t’u kumtohet Fjala e Krishtit,
Fjala që shpëton, Fjala e jetës e synimi jonë është ta bëjmë të pranishëm Jezusin
në botën e njerëzve të ditëve tona.