Ndeshje në Jeruzalem, në Sheshin e Xhamive: të paktën 20 të plagosur.
(25.10.2009 RV)Në Lindjen e Mesme, pas një periudhe pak a shumë të qetë, besimtarët
islamikë e policia izraelite u ndeshën përsëri sot paradite në Sheshin e Xhamive të
Jeruzalemit, një nga vendet më të shenjta për Islamin, por jo më pak për Hebraizmin. Policët
përdoren gaz lotësjellës kundër dhjetra të rinjve palestinezë, të cilët reaguan dhunshëm
kundër vizitorëve - të huaj e izraelitë – që po hynin në vendin e shenjtë. Çrregullimet,
gjatë të cilave policia u gjuajt me gurë e me lëndë ndezëse, u bënë shkak për arrestimin
e rreth 20 personave e për plagosjen e po aq të tjerëve. Situata duket nën kontroll.
Zona u mbyll menjëherë për publikun, ndonëse në Xhami janë ngujuar rreth njëqind
besimtarë islamikë, që nuk duan të largohen. Ishte e natyrshme, prandaj, frika, që
ndeshjet të rinisnin sonte, kur gjatë një takimi të organizuar nga një grup ultra-ortodoks
izraelit, pritej të pohohej e drejta e hebrenjve për të hyrë e për t’u lutur në Sheshin
e Xhamive. Kjo nismë i alarmoi liderët islamikë vendas, të cilët u kërkuan besimtarëve
ta mbrojnë Xhaminë al-Aksa, që ndodhet fare pranë Murit të Lotëve. Policia njoftoi
se do të marrë masa të rrepta kundër lëvizjes islamike në Izrael, pas kërkesës së
ndonjë politikani për ta nxjerrë jashtë ligji. Të rënda reagimet e Autoritetit
kombëtar Palestinez, të al-Fatah e të Hamasit, që e ngarkuan policinë hebraike me
akuzën se ka dhunuar shenjtërinë e Sheshit. Ndërsa policët u kritikuan ashpër nga
e djathta nacionaliste izraelite, sepse e lanë Sheshin në dorë të besimtarëve islamikë,
të gatshëm për të shkaktuar turbullira të reja.