"Compendium Eucharisticum" për etërit e Sinodit Afrikan
(25.10.2009 RV)Të premten, të gjithë
etërve të Sinodit për Afrikën iu shpërnda “Compendium Eucharisticum” – Një përmbledhje
eukaristike, që porsa u botua nga Kongregata për Kultin e Shenjtë dhe disiplinën e
sakramenteve. Kopja e parë iu dorëzua Atit të Shenjtë Benediktit XVI nga kardinali
Antonio Kanjizares Lovera, prefekt i kësaj Kongregate. Sikurse shpjegoi vetë prelati
teksti nuk paraqet asgjë të re përsa i përket normave liturgjike, por është vetëm
një përmbledhje të asaj çka thuhet në tekstet themelore lidhur me këtë çështje. Fillimisht
në latinisht, “Përmbledhja” do të botohet së shpejti edhe në gjuhë të tjera e do t’i
shpërndahet ipeshkvijve të të gjithë botës. Po, cilat janë synimet baritore të “Përmbledhjes
eukaristike”? Në mikrofonin tonë flet vetë kardinali Kanjizares Lovera. Ta
dëgjojmë:
El sinodo de los obispos.... Përgjigje: Sinodi
i ipeshkvijve mbi Eukaristinë pati kërkuar që të botohej një “Përmbledhje eukaristike”
në mënyrë që vëmendja të përqëndrohej tek ajo që është zemra e Kishës Katolike: Eukaristia.
Prandaj duhej gjallëruar feja e besimi, - në vazhdimësi me traditën, - në misterin
Eukaristik, si burim e kulm i jetës së krishterë të të gjithë Kishës. Duhej të bëheshin
të njohura burimet liturgjike kryesore, edhe për një kuptim të saktë, për kremtimin
dhe adhurimin e të Shenjtnueshmit Sakrament. Kjo u pat kërkuar nga Sinodi i ipeshkvijve
dhe Papa e mirëpriti siç shihet edhe tek Thirrja Apostolike e mbas Sinodit “Sacramentum
Caritatis”. Iu bë thirrje Kongregatës e cila punoi për këtë “Compendium” tek i cili
përmblidhen parimet doktrinore: duke filluar prej premtimit të Eukaristisë të Jezusit
kur flet për Bukën e Jetës tek Ungjilli sipas Shën Gjonit, e duke përfshirë edhe ato
që janë parimet themelore të doktrinës së krishterë të shprehura në Koncilin e Trentos
e që përfshihen si në Katekizmin e Kishës Katolike ashtu edhe në Përmbledhjen e Katekizmit
të Kishës Katolike. E gjitha kjo krijon një unitet doktrinor që është edhe misteri
i fesë sonë, misteri i Eukaristisë, në mënyrë që katekizmi t’i trajtojë këto tema,
në mënyrë që të njihen cilat janë pikat themelore që nuk mund t’i harrojmë e që prej
këndej pastaj të arrijmë tek një katekizëm i përshtatshëm, në mënyrë që populli i
krishterë ta përjetojë misterin eukaristik duke e vënë në qendër të jetës së vet. Pastaj
në pjesën e dytë të “Përmbledhjes” gjenden edhe tekstet liturgjike kryesore, mbi të
gjitha ato të Ritualit Romak, në vazhdimësi me trashëgiminë që shpreh i vetmi Ritual
Romak, që është edhe Lex orandi –(Rregullat e Lutjes) e në të njëjtën kohë edhe Lex
credendi –(Rregullat e Besimit). Rituali romak këtu është në dy forma: në atë të zakonshme
e në atë të jashtëzakonshme. Në fund pastaj përfshihen edhe hymnet e uratët, që i
paraprijnë kremtimit të Meshës Shenjte por edhe shumë e shumë uratë të tjera, që shprehin
fenë e gjallë të popullit të krishterë, jo vetëm në çastin kur kremtohet Eukaristia,
por edhe kur adhurojmë të Shenjtnueshmin.
Pyetje: Hirësi, teksti a përmban
të reja lidhur me rregullat liturgjike?
Non hay ninguna novedad Përgjigje:
Nuk ka asnjë të re. Këtu thjeshtë përmblidhet ajo çka beson, kremton dhe përjeton
Kisha në Misterin Eukaristik. Është një përmbledhje. Dhe kjo është fjala që e shpreh
më mirë, që përmbledh më mirë e më bukur atë që thuhet në tekstet themelore dhe kryesore,
që përmbledh atë çka Kisha beson dhe përjeton, që është edhe qendra e të gjithë Kishës,
e të gjithë jetës së krishterë, sepse vetëm duke u nisur nga Eukaristia mund të kemi
një Kishë të gjallë.
Pyetje: Hirësi, kujt i drejtohet kjo “Përmbledhje”?
A do t’i shpërndahet ajo ipeshkvijve në mbarë botën?
Sera distribuito
a los obispos de todo el mundo... Përgjigje: Sigurisht që do t’u
shpërndahet të gjithë ipeshkvijve në mbarë botën dhe do të botohet edhe në gjuhët
kryesore. Së pari botimi latinisht, si gjuhë zyrtare e Kishës, por qysh tani po përgatiten
edhe përkthimet në gjuhët kryesore të Kishës.
Pyetje: Si e priti Ati
i Shenjtë Racinger këtë “Përmbledhje” kur ia dorëzuat?
Con mucha alegria... Përgjigje:
Me shumë gëzim e priti edhe sepse pa se kjo dëshirë e Sinodit dhe e tij personale
u realizua. Për më tepër kjo rastisi me kremtimin e këtij Sinodi që padyshim do të
jetë një shtytje e madhe për Kishën në Afrikë, thjesht për faktin se kur jetohet Eukaristia,
pajtimi dhe paqja, atëherë Drita e botës është e pranishme në mesin tonë.