Editorial i atë Federiko Lombardit: Të shohim yjet
(17.10.2009 RV)“Astrum 2009: Astronomia
dhe mjetet. Trashëgimia historike italiane 400 vjet pas Galileut”. Ky është titulli
i ekspozitës së hapur më 16 tetor në Muzetë e Vatikanit, që do të mund të vizitohet
deri më 16 janarin e ardhshëm. Kësaj teme i kushtohet edhe editoriali javor i drejtorit
tonë të përgjithshëm, atë Federiko Lombardi: “Yjet vazhdojnë të shkëlqejnë
në qiell, por është gjithnjë e më e vështirë t’i shohim nga qytetet tona, si për shkak
të ndotjes së atmosferës, ashtu edhe për hir të dritave që qëndrojnë gjithnjë ndezur.
Një herë e një kohë ishte e natyrshme që psalmisti të këndonte: “Kur e sodis qiellin
– vepër e dorës sate, hënën e yjet që ti vendose…” (Psalmi 8). Sot ka rrezik t’i harrojmë. Viti
ndërkombëtar i astronomisë, që po vazhdon, mund të na ndihmojë të ngremë sytë drejt
qiellit, dhe pjesëmarrja aktive – me konferenca dhe ekspozita – e Observatorit të
Vatikanit (e famshmja “Spekola”) na inkurajon ta rigjejmë këtë hapësirë gati të natyrshme
të dialogut ndërmjet shkencës dhe fesë. Drejtori i ri i Spekolës, atë Funes, na thotë
se indianët e Arizonës – ku shkencëtarët kanë ndërtuar shumë observatorë për të vëzhguar
qiellin e kristaltë e pa re – i quajnë astronomët “populli me sy të gjatë”, për shkak
të teleskopëve. Pikërisht kështu: të gjithë duhet të zgjasim sytë, të mësuar të shohin
tepër afër, për të hapur tendën që nuk na lejon ta lëshojmë veten në dorën e habisë
marramendëse, të mrekullisë, të dridhjes, që zgjon thellësia e hapësirës përreth nesh.
E t’i bëjmë vetes pyetjet e pashmangshme: kush jemi e ku jemi, mbi këtë planet të
vogël e të brishtë, në fluturim në hapësirë e në kohë… Në fakt, psalmisti
vazhdon: “Çka është atëherë njeriu që ta kujtosh? E pra, i dhe pushtet mbi veprat
e duarve tua…”. E në fund e mbyll: “O Zot, Zoti ynë, sa i mrekullueshëm është Emri
yt mbi mbarë dheun!” Për shumë prej njerëzve të sotëm, ky përfundim nuk
vjen kaq shpejt, por të gjithë mund të rigjejnë pyetjen fillestare dhe sensin e misterit.
Le t’i shoqërojmë, duke hapur e zgjatur sytë për të kërkuar përgjigjet më të thella,
më të vërteta e më të bukura”.