(15.10.2009 RV)Është e famshme
fraza e filozofit të madh francez Paskal: “Zemra ka arësye, që arësyeja nuk i njeh”
(Mendime 277). Në të vërtetë, sipas Biblës zemra përfshin edhe inteligjencën: “Zemra
e të urtit kërkon mësim”, thuhet në Librin e Fjalëve të Urta (15,14). Mbreti Salomon,
para se të ulej mbi fron, i kërkon Zotit “një zemër të përvujtë”, që të dijë
të qeverisë sipas drejtësisë e moralit (1 Mbr 3,9). “Zemra” pra, është një realitet
i brendshëm, që përfaqëson ndërgjegjen e njeriut e pikërisht për këtë arësye, kjo
fjalë citohet në Bibël gati 2 mijë herë. Zemra është qendra e vetëdijes, simbol
i arësyes dhe i vullnetit, i vendimeve dhe i moralit. Gjithnjë në Librin e Fjalëve
të Urta lexojmë: “Zemra e njeriut kërkon udhën e vet…Zemra që sendergjon synime
të mbrapshta” (Fu 16,9; 6,18). Siç thoshte Jezusi, nga zemra “rrjedhin: mendimet
e këqija, llojet e ndryshme të fëlligështisë, vjedhjet, vrasjet, kurorëthyerjet, dëshira
e tepëruar për pasuri, mashtrime, shfrenia, smira, blasfemitë, krenia, marrëzia” (Mk
7,21-22). Përmes Hirit Hyjnor, zemra e ngurtë, që përshkruhet në Bibël, do të
shndërrohet në diçka tjetër, me prirje drejt së mirës. “Unë do t’u jap një zemër
tjetër”, i thotë Zoti Profetit Ezekiel, “nga trupi i tyre do të nxjerr zemrën e gurtë
e do t’u jap një zemër të mishtë” (11,19). Sigurisht, zemra është edhe simbol
i dashurisë dhe i pasionit, aq është e vërtetë, saqë i dashuruari në Këngën e Këngëve
thërret: “Ma plagose zemrën motra ime, nusezo, zemrën ma plagose me një shikim
të syve të tu” (4,9), ndërsa në Librin e Fjalëve të Urta: “Mos t’i lakomjë zemra
jote bukurisë” së gruas së tjetrit (6,25). Te zemra pra, përmblidhen të gjitha karakteristikat
e cilësitë e shpirtit dhe zemra bëhet edhe një përmasë themelore e Hyjit njeri, siç
përshkruhet në Shkimin Shenjt.Zoti ka një zemër që provon ndjenja, që merr vendime,
që mendon: “Si të dorëzoj ty Izrael? …Zemra ime në mua përmallohet, në brendinë
time flakë është ndezur dhimba” lexohet për shembull, në Librin e Ozesë (11,8). Edhe
për Krishtin, Ungjijtë përmendin zemrën. Vetëm një herë e bëjnë këtë qartë, në një
pikë me intensitet të jashtëzakonshëm: “Ejani tek unë të gjithë ju që jeni të lodhur
prej barrës së rëndë e unë do t’ju çlodh. Merrni mbi vete zgjedhën time e pranoni
t’ju mësoj unë që jam zemërbutë e i përvujtë” (Mt 11,28-29). Nga kjo thirrje do
të lindë devocioni tradicional për Zemrën e Krishtit, i cili mori hov sidomos me shenjten
Margarita Maria Alakok (1647-1690), kanonizuar në vitin 1920 nga Papa Benedikti XV.
Në Veprat e Apostujve (1,24 e 15,8) thuhet se Zoti është kardiognóstes, “i
njeh zemrat”. Prandaj, është e rëndësishme që njeriu ta shenjtërojë zemrën
e vet e t’ia rezervojë Zotit thelbin e saj intim e të thellë. Domethënëse për
këtë është besojma e famshme, që fillon me fjalën hebraike “Shemà”, “Dëgjo!”, shumë
e dashur për hebraizmin. Ajo rrjedh nga Libri i Ligjit të Përtërirë: “Dëgjo Izrael!
Zoti, Hyji ynë, është një Zot i vetëm. Duaje Zotin, Hyjin tënd, me gjithë zemrën tënde,
me gjithë shpirtin tënd, me gjithë fuqinë tënde!” (6,4-5) Kjo frazë do të bëhet
e dashur më vonë edhe për Jezu Krishtin, i cili do ta konsiderojë si “urdhërimin
më të madh të Ligjit” (Mt 22,36-37). Si përfundim, feja që e vë në qendër zemrën
nuk ka ndërmend përhapjen e ndonjë përshpirtërie sentimentale, por bashkimin e plotë
e kushtimin e njeriut ndaj Zotit.