Për herë të parë që prej një viti, Dow Jones mbyll me bilanc pozitiv. A është kapërcyer
kriza?
(15.10.2009 RV)Dje për herë të
parë që prej një viti bursa amerikane e Nju Jorkut Dau Xhons e mbylli aktivitetin
e saj me më se 10 mijë pikë, çka tregon qartë se ekonomia po rimëkëmbet pas krizës
të thellë që filloi vjet. Optimizëm për këtë shprehu edhe presidenti Barak Obama.
Po, a është kapërcyer me të vërtetë kriza? Në mikrofonin tonë përgjigjet Stefano Xamanji,
docent i ekonomisë politike pranë universitetit të Bolonjës.
Përgjigje: Krizat
kanë gjithmonë tre tregues: atë financiar, atë real dhe treguesin e punësimit. Është
e vërtetë se i pari, ai financiar pra, është kapërcyer dhe ky është shkaku që Dau
Xhons iu largua rrezikut, por faktori real nuk është kapërcyer ende ndonëse po kapërcehet.
Sidoqoftë është faktori i punësimit ai që ngjall shqetësim, sepse të shifrat për punësimin
për 2010 do të përkeqësohen edhe më tej në krahasim me 2009. Kjo do të thotë se papunësia
do të rritet.
Pyetje: Pikërisht në këto çaste kur erdhi lajmi i mirë se bursa
e Nju Jorkut e mbylli aktivitetin me bilanc pozitiv, u bë i njohur raporti i Organizatës
për Ushqimin dhe Bujqësinë (FAO) mbi urinë në botë. Aty thuhet se ka më se një miliard
njerëz që vuajnë nga uria. Pse ekonomia globale nuk është marrë kurrë seriozisht me
këtë problem?
Përgjigje: Nuk është se nuk është marrë, porse asnjë nuk flet
mbi këtë temë sepse kur flitet për kriza i referohemi vetëm të dhënave që kanë të
bëjnë me fianancën. Kjo ndodh ngaqë veprohet pa ndershmëri intelektuale, sepse po
falimentoi një bankë apo po qe se llogaritë financiare të disa ndërmarrjeve shkojnë
teposhtë, të gjithë çirren e bërtasin, por kur marrim vesh se miliona vetë, kryesisht
fëmijë, vdesin nga uria, atëherë thuhet: “Kjo nuk ka shumë rëndësi.” Me sa duket kultura
jonë ekonomike nuk e ka përvetësuar ende konceptin se ekonomia është në shërbim të
njeriut dhe jo e kundërta! Të mbetesh skllav i një koncepti për ekonominë që i përket
shekullit XIX të çon pikërisht në këto lloj arsyetimesh. Sigurisht, pastaj kur vjen
vakti, – sepse herët a vonë vjen – ka shumë që kërkojnë ndihmë dhe kapin kokën me
duar. Do të ishte mirë sikur këto gjëra t’i mendonin me kohë sepse ekonomia e tregut
nuk mund të ekzistojë nëse pabarazitë në shpërndarjen e të mirave materiale, domethënë
të ardhurat dhe pasuria, e kapërcejnë nivelin kritik.