Imzot Miliore në OKB: është njeriu, burimi më i madh për zhvillimin
(14.10.2009 RV)Sfidat e shumta
para bashkësisë ndërkombëtare për të arritur në një zhvillim më të madh e më të qëndrueshëm
ekonomik e shoqëror: kjo ishte tema e fjalimit që mbajti Vëzhguesi i Përhershëm i
Selisë së Shenjtë në OKB, imzot Çelestino Miliore, në Asamblenë e përgjithshme, që
po mbahet në Pallatin e Qelqit në Nju Jork. Demografia, familja, promovimi i gruas,
emigracioni, arësimi, shëndeti i nënës dhe i fëmijës: të shumta çështjet e rëndësishme
për të ardhmen e njerëzimit, 15 vjet pas Konferencës së Kajros mbi popullsinë e zhvillimin. Nëse
në vitin 1994 – kujtoi prelati – të gjithë mendonin se ishim përpara një shpërthimi
demografik, që do të pengonte zhvillimin global, sot shohim se kjo përshtypje ishte
e pabazuar. Zvogëlimi dhe plakja e popullsisë në shumë vende të zhvilluara kërkon
tani politika për rritjen e lindjeve, që të sigurohet mirëqënia ekonomike. Shumë vende,
dikur të varfëra, po zhvillohen me shpejtësi, të kërcënuar jo aq nga rritja demografike,
se sa nga papërgjegjësia e qeverisjes ekonomike botërore dhe lokale. Për një shekull
me radhë – nënvizoi imzot Miliore – janë bërë përpjekje për ta lidhur popullsinë me
ushqimin, energjinë, burimet natyrore e krizat ambientale. Sot, shohim se në të vërtetë,
janë personat pasuria më e madhe e botës. Po ashtu edhe familja, e cila njihet
nga OKB-ja si element që nxit zhvillimin më të madh ekonomik e shoqëror. Sot, ajo
duhet të përballojë sfidat e emancipimit të gruas në punë e në shtëpi, gjë, për të
cilën është e nevojshme ndihma e qeverive. E nëse personi është në qendër të
politikave të zhvillimit – tha Vëzhguesi i Përhershëm i Vatikanit në OKB – ashtu janë
edhe emigrantët, të cilët shpesh shihen si pasojë e pashmangshme e globalizimit dhe
paragjykimet ndaj tyre përdoren për të nxitur politika shpesh çnjerëzore. Së fundi,
imzot Miliore theksoi se është e rëndësishme që të gjithë të marrin arësimin e duhur
dhe nënvizoi qëndrimin e Selisë së Shenjtë kundër abortit, si mjet për planifikimin
familjar.