(11.10.2009 RV)Sot, Benedikti XVI kryesoi, në Sheshin e Shën Pjetrit, Meshën
për shenjtërimin e pesë të Lumëve. Janë: Zëgmund Shtensni Felinski (1822-1895):
Ipeshkëv polak, themelues i Kongregatës së Motrave Françeskane të Familjes së Marisë; Françisko
Kol i Gitart (1812-1895): meshtar katalan i Urdhërit të Vëllezërve Predikatarë
(Domenikanëve), themelues i Kongregatës së Motrave Domenikane të Zojës Nunciatë; Jozef
Damian de Vëster (1840-1889): Meshtar belg i Kongregatës së Zemrës së Krishtit
e të Zojës dhe Adhurimit të përhershëm të Sakramentit të elterit; Rafael Arnaith
Baron (1911-1938): Meshtar spanjoll i Kongregatës Cistercense të Klauzurës së
plotë; Maria e Kryqit (Zhan) Zhigâ (1792-1879): virgjër franceze, themeluese
e Kongregatës së Motrave të Vogla të të Varfërve.
Të njihemi shkurtimisht me
jetën dhe shembullin e tyre të shkëlqyer, gjithnjë aktual:ù Zëgmund Shtensni
Felinski ishte ipeshkëv titullar i Tarsit e kryeipeshkëv i Varshavës, ku zhvilloi
një veprimrtai të jashtëzakonshme për rilindjen shpirtërore e morale, duke u kujdesur
posaçërisht për përgatitjen e klerit, katekizmin në gjirin e popullit, ndihmesën e
të varfërve e të fëmijëve. Lindi në Ukrainën e sotme; studioi në Moskë e në Shën
Peterburg ku, më 1857, themeloi Kongregatën e Motrave të Familjes së Marisë. Për shkak
të besnikërisë ndaj Romës e të lidhjeve me Selinë Apostolike pa ndërmjetësimin e qeverisë
cariste, më 14 qershor 1863 u dënua me internim në Siberi, ku vijoi t’u jepte ndihmë
shpirtërore katolikëve dhe bashkëvuajtësve. Po cili është shembulli që na la trashëgim?
Përgjigjet motra Tereza Antonieta Fracek, françeskane e familjes së Marisë
dhe postulatore e Çështjes së Shenjtërimit:
Përgjigje: - Ishte njeri
tejet i thjeshtë, i përvujtë, i varfër, si Shën Françesku. Njihej me epitetin ‘Apostull
i harmonisë kombëtare dhe i vëllazërimit ungjillor”. Krishti ishte për të e vërteta
e jeta. Na kujton se edhe ne duhet t’i shërbejmë Zotit me të njëjtën thjeshtësi,
duke e jetuar Ungjillin si Shenjti i ri, që pati besim të pakushtëzuar në Provaninë
Hyjnore, duke u bërë edhe ne, në jetë e në punë, burim i thjeshtësisë e i paqës, ashtu
si Shën Zëgmundi.
Françisko Kol i Guitart, meshtar domenikan,
jetoi në Barcelonë të Spanjës, në periudhën e ligjeve antikishtare, që e detyruan
ta linte kuvendin, por jo thirrjen e tij domenikane për t’u predikuar të gjithë njerëzve
Ungjillin, së cilës i qëndroi besnik për gjithë jetën. E jetoi këtë thirrje pa kuvend
e pa zhgun, sepse deri zhguni ishte plotësisht i ndaluar në Spanjën e kohës. Postulatori
i tij, domenikani atë Vito Tomaz Gomez na përcjell mesazhin e Shën Françiskos
për ditët tona:
Përgjigje: - Besnikëri ndaj thirrjes së Zotit, deri
në fund, sepse është Zoti ai që na thërret. Mesazhi i tij është ai ungjillëzimit,
i besnikërisë, që në kushtet e persekutimit, arrin në shkallën më heroike, i impenjimit
misionar për mbarë botën, nga Evropa në skajet më të largëta të Planetit. Mbarë bota
ishte fusha e misionit të tij për përhapjen e Ungjillit.
Nuk është e lehtë
ta përmbledhësh me dy rreshta një jetë, si ajo e Jozef Damian de Vëster, aq
të pasur me ngjarje, flijime, fitore, pastërti, dëgjesë, varfëri, përvujtëri. Shenjti
i ri mbetet në kujtesën e popullit të Zotit si dëshmitar e shërbëtor i Hyjit, si Mjek
i korpit e i shpirtit, si Apostull i të gërbulurvre, Farëhedhës i ekumenizmit, Njeri
i Eukaristisë, Zë i njerëzve që nuk kanë zë, Lajmëtar i shpresës. Shërbëtor i Zotit,
Damiani është e do të jetë për ne të gjithë, shërbëtor i njeriut i cili, më shumë
se për të jetuar, ka nevojë për të kuptuar pse e si duhet të jetojë. Ja pra, ky
është Damiani, i cili sot na sfidon të gjithëve.
Rafael Arnaith Baron, oblat
i Urdhërit Cistercens, jetoi në shekullin e kaluar. Djalosh i zjarrtë, plot jetë,
i zgjuar e gjithnjë i shkëlqyer në bankat e shkollës, me prirje të jashtëzakonshme
për arkitekturë, kishte mundësi të pakushtëzuara për t’u ngjitur në shkallët më të
larta të shoqërisë së kohës. Por shpirti i tij ishte tepër i ndjeshëm, për të gjetur
tek karriera, realizimin e plotë të vetvetes. Zgjodhi, prandaj, jetën e manastirit,
ku iu desh të luftonte kundër sëmundjes së rëndë të diabetit, që i shkaktoi shumë
vuajtje deri sa vdiq, në moshën 27 vjeçare. Po, si u arrit që Murgu i panjohur
cistercens, që përbuzi ngjitjen në shkallët e karrierës, aq të lakmuar edhe në ditët
tona, të ngrihej deri në nderimin më të lartë, atë të elterit? Na përgjigjet postulatorja
e Çështjes së Shenjtërimit të tij, rregulltarja trapiste, motra Augusta Teskari:
Përgjigje:
- Rafaeli e zbuloi vetveten përmes shkrimeve, sepse ai shkruante me lehtësi të
madhe e la shumë letra shpirtërore. Kur vdiq, të gjithë e qanë si murg tejet të përshpirtshëm,
ndonëse jetoi në kuvend si oblat, domethënë si rregulltar pa kushte, për shkak të
sëmundjes, që e pengoi ta jetonte plotësisht rregullën e shtrënguar cistercense: zuri
kështu, deri në vdekje, një vend fare të parëndësishëm, vendin e fundit. Por ai e
pranoi me gjithë zemër këtë vend, që i krijoi mundësinë të jetonte, përmes Eukaristisë
e devocionit për Zojën e Bekuar, një lidhje të thellë me Hyjin, të kuptonte madhështinë
e Hyjit, mirësinë e Hyjit, mëshirën e atij, që është Zotëria i historisë. Na kujton
se edhe ne mund të flasim me Jezusin, si flitet me mikun më të ngushtë të zemrës,
që na dëgjon, na kupton, na ndihmon në çdo situatë të jetës.
Maria e Kryqit
(Zhan) Zhigâ, jetoi ndërmjet shekujve XVIII e XIX e, që në moshë të re iu kushtua
të varfërve e nevojtarëve. E pikërisht për ta themeloi Kongregatën e Motrave të Vogla
të të Varfërve, duke mbledhur rreth vetes gra të tjera, që dëshironin t’i kushtoheshin
Zotit, për t’u shërbyer njerëzve të përjashtuar nga radhët e shoqërisë.Atë Vito
Tomaz Gomes, domenikan e postulator i Çështjes së Shenjtërimit të Gruas që mbeti
në kujtesën e popullit të Zoti, si Maria e Kryqit, na përcjell mesazhin e saj:
Përgjigje:
- Na fton të ecim në rrugën e varfërisë, si rrugë në shërbim të Mbretërisë së
Hyjit. E t’i shërbesh kësaj Mbretërie, do të thotë të vësh në qendër të jetës Jezusin
e Marinë, ta ndjesh në çdo çast praninë e Hyjit, të lutesh pareshtur, ta duash të
afërmin e varfër e nevojtar, t’i japësh ndihmë shpirtërore e materiale, t’i duash
pleqtë e braktisur, ta duash Kishën, të jetosh në përvujtëri të plotë, një jetë të
fshehur në Krishtin, në Hyjin.