Nesër Papa do të shpallë Shenjtorë pesë të Lum, ndërmjet të cilëve, apostulli i të
gërbulurve, Damian de Vëster: mesazhi i Obamës.
(10.10.2009 RV)Nesër, duke nisur nga ora 10. 00, Benedikti XVI do të kryesojë,
në Sheshin e Shën Pjetrit, Meshën për shenjtërimin e pesë të Lumëve. Janë: Zëgmund
Shtensni Felinski (1822-1895): Ipeshkëv polak, themelues i Kongregatës së Motrave
Françeskane të Familjes së Marisë; Françisko Kol i Gitart (1812-1895):
meshtar katalan i Urdhërit të Vëllezërve Predikatarë (Domenikanëve), themelues i Kongregatës
së Motrave Domenikane të Zojës Nunciatë; Jozef Damian de Vëster (1840-1889):
Meshtar belg i Kongregatës së Zemrës së Krishtit e të Zojës dhe Adhurimit të përhershëm
të Sakramentit të elterit; Rafael Arnaith Baron (1911-1938): Meshtar spanjoll
i Kongregatës Cistercense të Klauzurës së plotë; Maria e Kryqit (Zhan) Zhigâ
(1792-1879): virgjër franceze, themeluese e Kongregatës së Motrave të Vogla të
të Varfërve.
Sot presidenti i SHBA-ve, Barak Obama vlerësoi lart figurën
e Damian de Vëster. Në një komunikatë, fituesi i Çmimit Nobel për Paqen 2009, që
ka lindur në Honolulu, kujton histori të ndryshme, dëgjuar në rini, mbi veprimtarinë
e palodhshme të Atë Damianit për të gërbulurit e Havait. “Atë Damiani – lexohet në
notën e Shtëpisë së Bardhë – sfidoi plagët e tmerrshme të sëmundjes, duke i dhënë
zë atij që s’kishte zë, derisa flijoi jetën, për t’u rikthyer dinjitetin njerëzve
të panumërt”. Në kohën tonë – vijon Obama - përballë miliona të sëmurëve, posaçërisht
viktima të Sidës, duhet të ndjekim shembullin e Atë Damianit për t’iu përgjigjur kërkesës
urgjente të kujdesit për të sëmurët. Presidenti amerikan bashkohet në lutje me
besimtarët e të gjitha feve, me Atin e Shenjtë e me miliona katolikët në mbarë botën,
në kremtimin kushtuar shenjtorëve të rinj, ndërmjet të cilëve, njeriu me jetë të jashtëzakonshme,
dëshmitari i Krishtit, Atë Damiani.