Liria fetare në qendër të fjalimit të Imzot Fronteiro pranë OSBE.
(09.10.2009 RV)“Liria fetare është një e drejtë themelore dhe më e rëndësishme
sesa liria e fjalës”. Kështu nënvizoi Imzot Antoni R. Fronteiro, përfaqësues i Këshillit
Papnor “Drejtësi dhe Paqë”, në fjalimin mbajtur me 29 shtatorin e kaluar në Varshavë
gjatë mbledhjes të Zyrës për Institucionet Demokratike dhe të Drejtat e Njeriut (ODIHR)
të OSBE-së, që është Organizata për Sigurinë dhe Bashkëpunimin Evropian. Duke
kujtuar se sfidat që lidhen me lirinë e mendimit, ndërgjegjen, fenë dhe besimin duhen
trajtuar, prelati pohoi se “disa nga këto sfida shpesh manifestohen në akte të mostolerancës,
dhunës dhe diskriminimeve por edhe në ndërhyrjen e shteteve tek kultet fetare”.
“Gjithashtu – vuri në dukje Imzot Fronteiro – kohët e fundit kanë lindur edhe probleme
të tjera që lidhen me një shoqëri gjithnjë e më relativiste, në të cilën ka orvatje
për ta mposhtur lirinë fenë” ose për ta asgjësuar krejtësisht në emër të mbrojtjes
të të drejtave të tjera. Me rëndësi të madhe, pra, për delegacionin e Selisë së
Shenjtë të vinte në pah atë çka vetë OSBE-ja ka deklaruar për lirinë fetare: “Njeriu
ka të drejtë të gëzojë liri fetare, një e drejtë që buron nga vetë dinjiteti dhe natyra
e njeriut, një e drejtë që na kujton se të gjithë njerëzit, burra e gra, janë të pajisur
me arsye dhe me vullnet të lirë dhe prandaj kanë përgjegjësi personale.” “Shtetet
– vijoi prelati – janë të detyruara të respektojnë dhe t’ua garantojnë të gjithëve
të drejtën e fesë dhe të besojmës, janë të detyruara të pranojnë se liria fetare është
provë që tregon se respektohen të gjitha të liritë e tjera.” Imzot Fronteiro shtoi
pastaj se duhet të ketë një dallim të vërtetë ndërmjet shtetit dhe fesë, por se kjo
e fundit nuk duhet të ndahet nga jeta shoqërore dhe kulturore sepse përfaqëson “një
kontribut të rëndësishëm dhe pozitiv për të gjitha ato shoqëri ku liria e fesë respektohet.
Në përfundim delegati i Vatikanit i ftoi shtetet të promovojnë ndihmesën që lira e
fesë mund t’i ofrojë edhe shoqërisë në përgjithësi.