Filmi dokumentar mbi dom Ndre Mjedën promovohen në Vaun e Dejës
(06.10.2009 RV)Banorë të shumtë të bashkisë së Vaut të Dejës, kanë qenë pjesëmarrës
të një aktiviteti promovues të filmit dokumentar kushtuar Dom Ndre Mjedës,
i cili është realizuar nga grupi realizues, producent Dom Nikë Ukgjini, me skenar
të studiuesit të afërt në vite të Mjedës, Mentor Quku, regjisorit Gjovalin Gjoni,
si dhe të aktorit kryesor që luan Mjedën, fotografit veteran shkodran Tonin Gega,
i cili ka një ngjashmëri të theksuar me Mjedën. Të pranishëm në këtë aktivitet
të organizuar në sallën e kulturës së Vaut të Dejës kanë qenë edhe drejtuesit e bashkisë
së këtij qyteti, intelektualë si dhe autoritete të tjera të kulturës dhe artit të
ardhur nga Shkodra dhe më gjerë. Në fjalën e tij të hapjes, producenti i
këtij dokumentari, Dom Nik Ukgjini, i cili përpos filmit dokumentar të Ndre Mjedës
është i njohur edhe për autorësinë edhe të pesë filmave të tjerë dokumentarë tha se,"
ndjente kënaqësi që ai me grupin realizues arritën të përfundojnë me sukses këtë dokumentar
duke i dhënë mundësi popullit shqiptar dhe më gjerë të kuptojnë më mirë se, kush ishte
poeti dhe kleriku Ndre Mjeda, të cilin e përjetësuan në një film dokumentar kushtuar
jetës dhe veprës së tij. " Ekipi realizues i këtij dokumentari zgjodhi Vaun
e Dejës për të bërë promovimin e tij, edhe për faktin se poeti i njohur, krahas Shkodrës
ku ai ka lindur dhe është rritur, një pjesë të mirë të jetës së tij e ka kaluar edhe
në territorin e bashkisë së Vaut të Dejës, si në Mjedë dhe shumë fshatra për rreth
tij, por edhe në famullinë e Kuklit, ku ai ka shërbyer për disa vite. Sipas
tij, filmimet për realizimin e dokumentarit janë realizuar pikërisht në këto zona,
por njëkohësisht, një pjesë e tyre janë bërë të mundura të realizohen edhe jashtë
vendit, si në Chatenau des Alleux, pranë Lavalit në Francë, në Kraljevicë të Dalmacisë
ku ka përfunduar studimet filozofike, në Krakova të Polonisë, ku përfundoi studimet
teologjike etj. Për 42 minuta që përmbante edhe minutazhi i këtij dokumentari,
të pranishmit e shumtë e kanë ndjekur atë me shumë interes, ndërkohë që organizatorët
theksuan se ky film dokumentar, shërben më së miri për transmetimin e ideve dhe vlerave
kulturore atdhetare dhe arsimore, tek brezat e rinj. Nga ATSH-Gasper Marku