Të jesh laik nuk do të thotë ta mënjanosh Kishën: kështu pohon Benedikti XVI në mesazhin
drejtuar Këshillit të Konferencave Ipeshkvnore të Evropës
(02.10.2009 RV)“Të jesh
laik nuk do të thotë ta mënjanosh Kishën: kështu pohon Benedikti XVI në mesazhin
drejtuar Këshillit të Konferencave Ipeshkvnore të Evropës. “Dallimi i qartë dhe
i drejtë ndërmjet Shtetit e Kishës nuk e ndan dhe e përjashton këtë të fundit (Kishën)
nga jeta shoqërore e kulturore”. Ky është urimi që Papa i dërgoi presidentit të Këshillit
të Konferencave ipeshkvnore të Evropës, kardinalit Peter Erdë, me rastin e Asamblesë
plenare që u hap dje pasdite në Paris. Benedikti XVI, shkruan kardinali Tarçizio
Bertone në mesazhin e dërguar në emër të Papës, “u siguron afërsinë e tij shpirtërore
e të përzemërt presidentëve të konferencave ipeshkvnore të kontinentit të vjetër”,
ndër të cilët është edhe Presidenti i Konferencës ipeshkvnore të Shqipërisë, imzot
Rrok Mirdita, i cili deri të dielën do të shqyrtojë bashkë me të tjerët temën e marrëdhënieve
ndërmjet Kishës e Shtetit. Në mesazhin e tij, Papa kujton se “Kisha është besnike
ndaj misionit të vet të vërtetë në favor të një shoqërie që duhet t'i shkojë për shtat
njeriut, dinjitetit e thirrjes së tij”. E kjo besnikëri “është garanci e një zhvillimi
njerëzor të tërësishëm, riparim i çrregullimeve të shumta prej të cilave bota sot
vuan”. Prandaj, vetë Kisha, vijon teksti i mesazhit të Benediktit XVI, “dëshiron
që jeta e njerëzve dhe e popujve të frymëzohet e të drejtohet nga dashuria e bamirësia.
Kështu ajo bashkëvepron në ndërtimin e atij qyteti të Zotit drejt të cilit ecën familja
njerëzore”. Kujtojmë se në qendër të punimeve të mbledhjes së Presidentëve të Konferencave
Ipeshkvnore të Evropës, që do të përfundojnë këtë të diele, janë marrëdhëniet Shtet-Kishë,
marrëdhënie që janë përmirësuar dukshëm në Vende të ndryshme të Evropës, pas rënies
së komunizmit. Një shenjë e marrëdhënieve të mira që ekzistojnë ndërmjet Shtetit e
Kishës është edhe takimi i një delegacioni kardinalësh e ipeshkvijsh me presidentin
e Francës, Nikolas Sarkozi.