Kardinali kryeipeshkëv i Pragës, Miloslav Vlk: vizita e Papës e vuri sërish Kishën
çeke në qendër të jetës shoqërore
(29.09.2009 RV)Akoma vazhdon jehona e shtegtimit të 13-të apostolik të Papës
Benedikti XVI në Republikën Çeke, udhëtim triditor, që përfundoi dje. Ati i Shenjtë
mbeti thellësisht i mallëngjyer nga pritja e përzemërt, që i rezervoi popullsia dhe
Kisha e vendit. Kjo e fundit, pikërisht për hir të vizitës së Papës, doli nga mënjanimi
në të cilin dëshiron ta lërë shekullarizimi i përhapur, për ta vënë sërish veten në
qendër të jetës shoqërore çeke. Por mbi frytet e pranisë së Benediktit XVI në Pragë,
Brno e Stara Boleslav, të dëgjojmë kryeipeshkvin e kryeqytetit çek, kardinalin
Miloslav Vlk:
Nëse
duhet ta përmbledh situatën me një fjalë do të thosha “shpresë”, sepse para se të
vinte Papa, imazhi i vendit tonë në media ishte ai i një vendi ateist dhe të shekullarizuar.
Në të vërtetë, realiteti që doli në pah e që u përjetua nga Ati i Shenjtë ishte tjetër:
kishte shumë besimtarë, shumë njerëz në Brno e në Stara Boleslav pranë Pragës. Edhe
ai vetë e tha këtë dhe u pa se prania e njerëzve nuk ishte vetëm për kuriozitetin
që të shihnin një person të rëndësishëm, por për fenë. E Ati i Shenjtë e ndjeu këtë,
sidomos në Stara Boleslav, ku ishin shumë të rinj. Gëzimi i tyre ndikoi shumë e Ati
i Shenjtë, në drekën e fundit me ipeshkvijtë tha se kjo ishte një vizitë e jashtëzakonshme.
Gjatë
këtyre ditëve, Benedikti XVI tha fjalë të rëndësishme jo vetëm për fenë, por edhe
për jetën e përditshme të bashkëatdhetarëve tuaj e jo vetëm për ta. Hirësi, çfarë
ju ka bërë më shumë përshtypje nga fjalët e Atit të Shenjtë?
Papa vlerësoi
traditën tonë shpirtërore e më duket se shën Vençeslau, si fisnik e si martir, ishte
figura simbolike e kësaj historie. Në të njëjtin person bashkohen shoqëria e Kisha.
Kjo më bëri shumë përshtypje. Ati i Shenjtë e provoi këtë sidomos në Stara Boleslav,
vendi i martirizimit të shën Vençeslaut. Fakti që festa e tij është festë kombëtare
më duket domethënëse.
A keni dëgjuar se ç’jehonë pati ky udhëtim ndërmjet
besimtarëve?
Po, e komentet ishin shumë pozitive. Ata panë se Papa është
i thjeshtë, i përvuajtur. U prit me respekt e me gëzim të madh.
Për Kishën
e një vendi, vizita e Papës shënon gjithnjë një ndarje në para dhe pas vizitës. Si
rifillon jeta e Kishës çeke pas takimit me Benediktin XVI?
Më parë, Kisha
shihej si një grup i vogël në skaj të shoqërisë e të jetës shoqërore. Me vizitën e
Atit të Shenjtë, shoqëria sheh se jemi pjesë e Kishës universale, botërore e se tani
rreshtohemi pas këtij autoriteti të madh moral e shpirtëror, që është Papa. Më duket
se kjo vizitë ka pasur efekte të thella në situatën dhe pozicionin e Kishës në shoqërinë
tonë.