Të rinjtë çekë kanë nevojë për përgjigje mbi kuptimin e jetës. Me ne, kapelani i Universitetit
Karli të Pragës
(28.09.2009 RV)Papa u dha takim
të rinjve në Ditën e ardhshme Botërore të Rinisë, që do të zhvillohet në Madrid të
Spanjës, në vitin 2011. Nga ana e tyre, të rinjtë i dhuruan Atit të Shenjtë një album
me fotografi nga jeta e rinisë dhe mbi 11 mijë euro, si solidaritet për Afrikën, kuotë
që do të vazhdojë të mblidhet. Por cila është situata e rinisë çeke në ditët e sotme?
Të dëgjojmë kapelanin e Universitetit Karli të Pragës, jezuitin atë Petr Havliçek: Në
brezin e ri aktual duket një indiferencë më e madhe për fenë e një lloj largimi edhe
nga traditat kombëtare të vendit: jetohet më shumë në të tashmen se në të kaluarën.
Unë mendoj se ky është problemi themelor: jo aq konsumizmi, se sa kjo humbje e rrënjëve. Si
mund t’i arrijë Kisha këta të rinj? Është një pyetje e vështirë dhe është edhe
një sfidë e madhe për të gjetur rrugët e afrimit. Një rrugë që duket se po jep rezultate
është hapja e dyerve për të gjithë, sidomos për të rinjtë e moshës 18-20 vjeç e më
tej, të cilët në universitet po kërkojnë diçka të ndryshme nga konsumizmi. Duhet të
jemi të gatshëm për t’ju përgjigjur pyetjeve të tyre mbi kuptimin e jetës. Cilat
janë shpresat pas këtij udhëtimi të Papës? Besoj se Kisha në vendin tim mund
të bëhet tharm për të krijuar një identitet të fortë shpirtëror e për të kuptuar sërish
rëndësinë e përjetimit të fesë si diçka e menduar mirë, që edhe për ne të jetë një
ndihmë për të dialoguar me të gjithë ata, që nuk besojnë në Zot.