(26.09.2009 RV)Kryeqyteti i Republikës Çeke (1.200.000 banorë) shtrihet në
dy brigjet e lumit Moldava, në një lartësi prej 160 deri në 352 metra, mbi shtatë
kodra, i mbrojtur mirë nga erërat e veriut, por i hapur nga jugu. Njeriu ka shkelur
këtu që në kohën e Neolitikut, por në shekullin X këtu lulëzon kështjella më e rëndësishme
e Bohemisë, ndërtuar mbi kodrën, që sot quhet Hradçani. Qyteti zhvillohet gradualisht
rreth kështjellës me kontributin e artizanëve dhe tregtarëve. Në vitin 1257, mbreti
Premysl Otokaro II themelon “Qytetin më të vogël” që u rezervohet kolonëve gjermanë.
Perandori Karl i Luksemburgut e bën atë kryeqytetin e vet e themelon universitetin
“Karolinum” (1347) që mban emrin e tij. Nunci Apostolik i kohës, Rudolfi, shkruante:
“Pak vende të botës mund të mburren me një qytet, bukuria e të cilit t’i afrohet sadopak
asaj të Pragës… e nuk e di nëse qytete si Roma, Venediku e Firence mund të barazojnë
bukurinë e kësaj perle në zemër të Evropës”. Pas një periudhe dekadence nga fundi
i viteve 1500, qyteti ringjallet nga ndërtimet e fisnikëve e të Kishës. Zhvillimi
urbanistik pasohet nga ai industrial e kështu shtohen lagje të reja që në vitin 1823
përfshihen në të ashtuquajturën Praga e Madhe. Që nga revolucioni i vitit 1848, Praga
është gjithnjë e më tepër në qendër të lëvizjes nacionaliste çeke. Të shumta e të
çmueshme janë monumentet e epokës romanike, gotike, të Rilindjes e të epokës baroke.
Institutet e arësimit të mesëm, muze e biblioteka shumë të pasura, teatret plotësojnë
kuadrin e qytetit ku ka lindur Franc Kafka dhe poeti Rainer Maria Rilke e ku ka dhënë
mësim fizike Albert Ajnshtajni. Në vitin 1992, qendra historike e Pragës hyn në
listën e pasurive të mbrojtura nga UNESCO. Me këtë qytete janë lidhur jetët e shenjtorëve
bohemë si shën Ludmilla, martire (859-920), shën Vençeslau martir, nip i Ludmillës
(fillimi i shekullit X – 929 ose 935), shën Adalberti, ipeshkvi i parë bohem, martirizuar
në Prusi (956-997), shën Prokopi (979-1053), shën Anjezja (1205-1280), shën Gjon Nepomuçeni,
martir (rreth 1340 – 1393), shën Gjon Nepomuçeni Nojman, ipeshkëv i Filadelfias (1811-1860)
etj..