(26.09.2009 RV)“Jezusi Fëmijë i Pragës” bën pjesë në traditën mijëravjeçare
të kultit të fëmijërisë së Krishtit. Zoti, në formën e fëmijës së vogël, është nderuar
nga Etër të Kishës si shën Jeronimi, i cili kaloi 34 vjet të jetës së tij si shtegtar
afër vendit ku lindi Krishti. Të devotshëm nga Jezusit Fëmijë kanë qenë edhe shën
Françesku i Asizit e Shna’Ndou, i cili pasqyrohet me Jezusin Fëmijë në krah. Kulti
i Jezusit Fëmijë u përhap në periudhën baroke sidomos pas vizioneve të shën Terezës
së Avilës, reformatore spanjolle e Urdhërit Karmelitan. E pikërisht nga Spanja
duket se është nisur shtatorja e vogël që nderohet sot në kishën e Zojës së Fitores
në Pragë. Ajo u është dhuruar karmelitanëve nga Princesha Poliksena e Lobkovicit në
vitin 1628. 47 cm e lartë, prej druri mbuluar me dyll, shtatorja paraqet Jezusin Fëmijë,
i cili, në ndryshim nga shumë shtatore mesjetare, nuk është lakuriq por i veshur me
një këmishë që i shkon pas trupit. Gardaroba e fëmijës hyjnore është shumë e pasur
e përmban rreth 60 veshje të ofruara nga besimtarët e vendeve të ndryshme (edhe nga
Vietnami e Kina) në shenjë falenderimi për hiret e dhuruara. Shtatorja zbukurohet
me stoli të ndryshme e me një kurorë të dhuruar nga ipeshkvi i Pragës në vitin 1655.
Shtatorja mbahet në një kuti kristali në Altarin kryesor të kishës. Kopje të kësaj
shtatoreje mrekullibërëse nderohen në shumë kisha të Pragës, në Sllovaki, Gjermani,
Francë, Poloni, Hungari, Austri, Filipine, Vietnam e Kinë.