Ati i Shenjtë e këshilloi klerin çek të dialogojë me shoqërinë e të kujdeset për formimin
e rinisë
(26.09.2009 RV)Dita e sotme e vizitës së Atit të Shenjtë në Republikën Çeke
përfundoi me lutjen mbrëmësore në Katedralen e shën Vitos në Pragë, në praninë e ipeshkvijve,
meshtarëve, rregulltarëve, seminaristëve e lëvizjeve të laikëve. Papa kujtoi reliket
e martirëve që ndodhen në këtë kishë: shën Vito, por edhe shën Vençeslau e shën Adalbertit,
shën Gjon Nepomuçeni e të tjerë martirë, të vjetër e të rinj, që dhanë jetën për Krishtin. Pikërisht
prej heroizmit të tyre duhet të rilindë lidhja personale dhe e thellë e Kishës postkomuniste
çeke me Krishtin. Aty duhet gjetur energjia shpirtërore për të realizuar vokacionin
e krishterë. “Vetëm dashuria e Krishtit e bën të vlefshme veprimtarinë apostolike,
sidomos në momentet e vështirësisë e të sprovës” – i tha Benedikti XVI klerit
katolik, të cilin e ftoi të imitojë Mësuesin Hyjnor, që nuk erdhi për t’u shërbyer,
por për të shërbyer. Në krizën e vlerave shpirtërore, që ka përfshirë shoqërinë
çeke, theksoi Papa, është i nevojshëm urgjentisht një impenjim më i madh nga Kisha
për të përforcuar vlerat shpirtërore e morale. Shkollat katolike të promovojnë respektin
për njeriun, të ndiqen të rinjtë edhe jashtë shkollave, pa harruar të tjerët, sepse
Krishti është për të gjithë. Të bashkëpunohet me institutet publike e private, pa
kërkuar privilegje, por duke u vënë në shërbim të të gjithëve. Këto ishin këshillat
e Papës, që pati një fjalë të veçantë për çdo kategori të klerit e sidomos për seminaristët,
të cilëve u kërkoi të kenë një formim të qëndrueshëm kulturor, shpirtëror e baritor.
Shembulli për t’u ndjekur në këtë Vit Meshtarak, është shën Gjon Maria Vianej, Famullitari
i Shenjtë i Arsit, të cilit i kushtohet viti. Nesër, Papa Benedikti XVI do të
shkojë në Brno të Moravisë për Meshën dhe Lutjen e Engjëllit të Tënzot e do të kthehet
sërish në Pragë për aktivitete, që do t’i pasqyrojmë gjerësisht në emisionin tonë.