(22.09.2009 RV)Në Nju Jork u hap sot takimi botëror mbi klimën. Se ç’do të
ndodhë në botë me ngrohjen e shkaktuar nga njeriu, përmes të ashtuquajturave gaze
serë, varet nga qëndrimi amerikan, indian e kinez. Samiti i organizuar nga sekretari
i përgjithshëm i OKB-së, Ban Ki-Mun ka për qëllim të nxjerrë nga gjendja e stanjacionit
bisedimet ndërkombëtare mbi këtë temë, duke pasur parasysh takimin e Kopenhagenit
në dhjetor. Pa dyshim, vëmendja sot u përqëndrua në presidentin amerikan, Barak
Obama. Pas fjalimit të mbajtur në OKB, ku u duk qartë qëndrimi i ri i administratës
amerikane ndaj klimës, Obama u takua me kryeministrin izraelit Benxhamin Netanijahu
e më pas me presidentin palestinez, Abu Mazen. Në fund, takimi tripalësh synoi rifillimin
e bisedimeve për paqen në Lindjen e Mesme. Obama dëgjoi më pas krerët e shteteve të
Afrikës sub-sahariane dhe u takua me presidentin kinez Hu Hintao. Ja mendimi i
sekretarit të përgjithshëm të organizatës “Action Aid”, Luka De Fraia: India
dhe Kina bëjnë pjesë në vendet që po zhvillohen ekonomikisht me shpjetësi, përmes
një procesi të jashtëzakonshëm industrializimi. Prandaj, ato kontribuojnë më shumë
në rritjen e emetimit të gazeve ndotëse të atmosferës. Këto vende nuk i pranojnë lehtë
objektivat për reduktimin e emetimit të këtyre gazeve, pasi kjo do të përbënte pengesë
për zhvillimin. Po përsa i përket SHBA-ve? Kujtojmë se SHBA-të, pikërisht
pak muaj më parë morën vendime të rëndësishme për të reduktuar – për shembull – me
17% emetimet e gazit serë. Është një provë themelore për Obamën. Gjithsesi në Kopenhagen
pritet të përcaktohet vetëm korniza e një marrëveshjeje, që mund të arrihet në muajt
e mëvonshëm. Ndërkaq, izraelitët po bëjnë presion që të bojkotohet fjalimi
i presidentit iranian Mahmud Ahmadinexhad në Asamblenë e Përgjithshme të OKB-së, ndërsa
stafi i liderit të Libisë, Muhamar Gedafi mundohet t’i gjejë atij një rezidencë të
denjë. Amerikanët nuk pranuan që Gedafi të banonte në tendën beduine, të cilën e merr
gjithnjë me vete në takimet ndërkombëtare. Disa vetë të personelit u paraqitën si
hollandezë për të marrë me qira një pallat në Nju Jork, por u zbuluan shpejt nga agjensia
që merrej me praktikën.