Të kapërcehen gënjeshtrat dhe egoizmi në bashkësitë fetare e civile: kështu Papa në
Engjëllin e Tënzot. Dhimbje për atentatin në Afganistan
(21.09.2009 RV)Të kapërcehen gënjeshtrat
dhe egoizmi në bashkësitë fetare e civile: kështu foli dje Papa në Lutjen e Engjëllit
të Tënzot, gjatë së cilës shprehu edhe dhimbjen e thellë për viktimat italiane të
atentatit në Afganistan dhe lajmëroi nisjen për në Republikën Çeke. Benedikti XVI,
i cili ndodhet akoma në Castelgandolfo, rezidenca e tij verore, denoncoi prirjen për
të mos respektuar të vërtetën e për ta lënë veten në dorën e hakmarrjes e të urrejtjes.
Në ditët e sotme – theksoi Ati i Shenjtë – shihet qartë kjo prirje për të mos e mbajtur
fjalën e dhënë sëbashku me prirjen drejt agresivitetit e dhunës. Ndoshta kjo bën pjesë
në disa lloj dinamikash brenda shoqërisë së masës, shpjegoi Papa më pas: “Pse
të mos marrim nga burimi i pastër i dashurisë së Zotit urtinë e zemrës, që na heq
helmin e skorieve të gënjeshtrës e të egoizmit?” Papa mori shkas nga Letra
e Jakut në liturgjinë e djeshme, në të cilën kundërvihen urtia e dituria e vërtetë
me atë të gënjeshtërt. Njëra është “tokësore, materiale, djallëzore”, tjetra “që vjen
nga lart është e pastër, paqësore, e përvujtë, e mëshirshme, frytdhënëse dhe e sinqertë”:
“Ashtu si Zoti nga i cili vjen, dituria nuk ka nevojë të imponohet me forcë, pasi
ka fuqinë e e pathyeshme të së vërtetës e të dashurisë, e cila afirmohet vetë. Prandaj
është paqësore, e butë dhe e urtë; nuk mban anë, e aq më pak thotë gënjeshtra; është
e dhembshur dhe bujare, njihet nga frytet e mira që prodhon me shumicë”. Për
të bërë vepra paqeje duhet të jemi njerëz të paqes, nënvizoi Benedikti XVI: “Nëse
secili, në ambientin e vet, do të arrinte ta hidhte poshtë gënjeshtrën e dhunën me
mendime, fjalë e vepra, duke kultivuar me kujdes ndjenja respekti, mirëkuptimi dhe
vlerësimi për të tjerët, ndoshta nuk do t’i zgjidhte të gjitha problemet e jetës së
përditshme, por do t’i përballonte më qetësisht e më mirë”. Pas lutjes mariane,
Papa foli për situatat e konfliktit në botë e në veçanti përmendi gjashtë ushtarët
italianë të vrarë në Afganistan nga talebanët. Kujtojmë se funerali i tyre shtetëror
u kremtua sot në Romë, në Bazilikën e Shën Palit jashtë mureve, në një ditë zie për
krejt Italinë. Ati i Shenjtë shprehu dhimbjen e tij të thellë për humbjen e rëndë: “Bashkohem
me lutjen dhe vuajtjen e familjarëve dhe të bashkësive civile e ushtarake e, njëkohësisht,
mendoj me të njëjtat ndjenja për kontingjentet e tjera ndërkombëtare, të cilat kanë
pasur viktima edhe kohët e fundit e që veprojnë për të nxitur paqen e zhvillimin e
institucioneve, kaq të nevojshme për bashkëjetesën njerëzore”. E Benedikti
XVI nuk mungoi të bëjë një thirrje për krejt botën: “Dëshiroj të rinovoj këtu
inkurajimin për nxitjen e solidaritetit ndërmjet kombeve për t’iu kundërvënë logjikës
së dhunës e të vdekjes, për të favorizuar drejtësinë, pajtimin, paqen e për të mbështetur
zhvillimin e popujve, duke u nisur nga dashuria e mirëkuptimi i ndërsjelltë”. E
në fund të Lutjes së Engjëllit të Tënzot, dje në Kastelgandolfo, Ati i Shenjtë lajmëroi
udhëtimin e ardhshëm apostolik në Republikën Çeke, ku do të shkojë nga data 26 shtator
deri më 28 shtator, me etapa në Pragë, Brno, Moravi e në Stara Boleslav, vendi i martirizimit
të shën Vençeslaut, Pajtori kryesor i kombit: “Republika Çeke gjendet gjeografikisht
dhe historikisht në zemër të Evropës e pasi kaloi përmes dramave të shekullit të kaluar,
ka nevojë, ashtu si krejt kontinenti, të rigjejë arësyen e fesë e të shpresës”.