Identiteti meshtarak vihet në provë nga shekullarizimi: kështu Papa në takimin vjetor
për ipeshkvijtë e rinj
(21.09.2009 RV)Identiteti meshtarak
vihet në provë nga shekullarizimi në rritje. Kështu foli sot Papa Benedikti XVI në
takimin vjetor për ipeshkvijtë, që kanë filluar prej pak kohe shërbimin e tyre pastoral,
duke u kërkuar që t’i ndihmojnë më shumë meshtarët: “Një nga detyrat themelore
të ipeshkvijve është të ndihmojnë me shembullin e mbështetjen e tyre vëllazërore meshtarët,
që ata të ndjekin me besnikëri thirrjen e tyre e të punojnë me entuziazëm e dashuri
në vreshtin e Zotit”. Misioni i meshtarit e edhe ai ipeshkvit, nënvizoi Papa,
është bërë më i ndërlikuar në ditët e sotme. Ai përfshin një sërë punësh e impenjimesh,
që mund ta largojnë presbiterin nga identiteti i tij si meshtar i Krishtit: “Një
identitet që fatkeqësisht, sot, vihet në provë nga shekullarizimi në rritje”. Në
këtë mënyrë, shpjegoi Papa, mund të arrihet deri aty sa të mungojë linfa, mbështetja
në çastet e pasigurisë e të shkurajimit, burimi i paçmueshëm i entuziazmit misionar
dhe i dashurisë vëllazërore për të gjithë. Benedikti XVI i këshillon meshtarët dhe
ipeshkvijtë të rigjejnë sërish vetveten përmes lutjes. Të jesh në dispozicion të njerëzve,
theksoi Papa, nuk do të thotë të mos jesh, ose të jesh më pak në dispozicion të Zotit: “Kusht
i domosdoshëm që meshtari të prodhojë fryte të mira është në fakt, që ai të mbetet
i bashkuar me Zotin. Këtu qëndron sekreti i fekonditetit të shërbimit të tij: vetëm
nëse është një gjë me Krishtin, hardhia e vërtetë bën fryte”. Në qendër të
jetës së meshtarit duhet të jetë pra, Eukaristia. Papa kujtoi se këtë vit e shpalli
Vitin Meshtarak, në 150-vjetorin e vdekjes së Shën Gjon Marian Vianejt, për t’i nxitur
të gjithë meshtarët të rinovohen shpirtërisht e ta dëshmojnë më shumë Ungjillin në
botën e sotme, prandaj u tha ipeshkvijve: “Mesha e Shenjtë është formuese në
kuptimin më të thellë të termit, pasi nxit ngjashmërinë me Krishtin dhe përforcon
thirrjen e meshtarit. Le të bëhet pra, kremtimi eukaristik dritë për krejt ditën tonë
e atë të meshtarëve tuaj, duke lënë gjurmën e hirit dhe të fluksit të tij shpirtëror
në çastet e trishtuara e të gëzuara, të shqetësuara ose të qeta, të veprimit ose të
kundrimit”. Imitimi i Jezu Krishtit, Bariut të Mirë, theksoi Papa Racinger,
është për çdo meshtar rruga e detyrueshme për shenjtërimin e jetës së vet e kusht
thelbësor për ushtrimin me përgjegjësi të shërbimit baritor. E nëse kjo vlen për meshtarët
– përfundoi Benedikti XVI – aq më shumë vlen për ipeshkvijtë.